SI Talisay City Mayor Eduardo Gullas mimando sa kapulisan nga mohatag kini og positibong resulta sa ilang operasyon nunot sa daghang gipangayong suporta gikan sa siyudad.
Una niini, ang kapulisan sa Talisay nangayo og duha ka bag-ong mga patrol car kang Gullas.
Karong sunod buwan na maabot ang duha ka mga sakyanan nga ilang gipangayo.
Karong bag-o, si Supt. Jason Villamater nangayo na usab og kahimanan alang sa ilang mga sakop sa Special Weapons and Tactics (SWAT).
Samtang, dugang gasoline allowance alang sa ilang mga motorsiklo nga gigamit sa ilang operations libot sa dakbayan.
Matod ni Supt. Villamater nga mapasalamaton siya sa mayor kay wala kini magpanuko sa pagsuporta sa kapulisan.
Nagkanayon si Villamater nga dako kinig tabang sa mga sakop sa Swat tungod kay iyang nakita nga kuwang kaayo kinig kahimanan.
Moduso pa siyag mga listahan sa mga angayang paliton nga dili na kinahanglan pang paliton sa gawas sa nasod.
Samtang ang gasoline allowance sa mga motorsiklo dako kinig tabang usab sa ilang mga operasyon.
Sa iyang bahin, si Gullas niingon nga iya kining ihatag ang tanan tungod kay usa kini sa iyang prayoridad ang paghatag sa panginahanglan sa kapulisan aron mamintinar ang kahusay ug kalinaw.
Dako siya'g salig sa iyang bag-ong hepe nga si Villamater nga makahimo sa iyang trabaho. (DRT)