Nailang tulisan sa Mandaue nasikop | SunStar

Nailang tulisan sa Mandaue nasikop

Time to read
less than
1 minute
Read so far

Nailang tulisan sa Mandaue nasikop

Friday, November 10, 2017

TULISAN sa dakbayan sa Sugbo ug Mandaue ang nasikop sa Mandaue City Police Office (MCPO) didto sa dalan Hernan Cortes, corner AS Fortuna, Brgy. Banilad, Mandaue niadtong Huwebes sa hapon.

Ang suspek giila nga si Mark Anthony Luchen, 32, taga Brgy. Talamban, dakbayan sa Sugbo.

Nasuta ning mantalaan nga si Luchen maoy responsable sa sunod-sunod nga mga kaso sa tulis sa Banilad ug Cabancalan, Mandaue City diin kini mogamit og wa mailhing kalibre sa armas aron mahadlok ang biktima.

Matod ni Chief ldefonso Mi­randa, hepe sa Station 4 sa MCPO, nga human sa ilang pag­susi ug koordinasyon sa silingang dakbayan, nasuta nila gikan sa Talamban Police nga susama og modus si Luchen sa pagpanulis niini sa Talamban.

Tungod niini, nihimo og checkpoint ang kapulisan sa may Hernan Cortes pasado alas 2 sa hapon ug didto ilang napahunong ang si Luchen nga wa nag-helmet.

Dugang ni Miranda nga wa kini mopatuo, nipasutoy kini’g padagan maong gigukod sa kapulisan ug nasikop. (JPP)

Gipatik sa mantalaang Superbalita Cebu Nobyembre 11, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments