Masuso bunyagan na unta karong Dominggo | SunStar

Masuso bunyagan na unta karong Dominggo

Time to read
1 minute
Read so far

Masuso bunyagan na unta karong Dominggo

Tuesday, November 14, 2017

Gihaya. Di mahulagway ni Lenlen Suson (galingkod), inahan ni Ayeshe Mae Suson, ang kasakit samtang nagsud-ong sa haya sa anak sud sa ilang balay sa Barangay Pajac, dakbayan sa Lapu-Lapu. (Alan Tangcawan)

NAMATAY nga wa mabunyagi ang tulo ka buwan nga si Ghirvaughn McReign Limpangog nga gikatakda unta nga bunyagan karong Dominggo.

Gisul-ob ni Limpangog ang barong tagalog diha sa iyang haya nga mao untay gamiton sa iyang bunyag.

Ang masuso namatay niadtong Nobiyembre 11, 2017 sa 2:20 sa hapon sa Vicente Sotto Memorial Medical Center (VSMMC).

Nagduda ang banay nga kadtong bakuna nga Penta­valent nga gihatag sa Pajac Barangay Health Center, Lapu-Lapu City maoy nakaingon sa iyang kalit nga kamatayon.

Ang apohan sa bata nga si Ariel Igoy, 45, nagduda nga na-overdose ang iyang apo sa bakuna kay inay nga kaduha kini ihatag sa managlahi nga schedule, apan giingong gikausa ra sa midwife sa barangay ang pag-inject niini.

Samtang hulagway sa inahan nga si Gian Millicent Igoy, 20, way gibati ang iyang anak sa dihang iyang gidala sa barangay health center alang sa iyang second dose sa Pentavalent vaccine sa Nobiyembre 8.

Ang Pentavalent vaccine naghatag og proteksiyon sa bata batok sa diphtheria, pertuses, tetanus, hepatitis B virus ug Haemphilus Influenza type B (HIB).

Unang gidala sa tambalanan si Limpangog niadtong Nobiyembre 10 sa gabii sa City Hospital sa Lapu-Lapu gumikan sa grabeng hilanat, apan gitambagan sila sa tambalanan nga ibalhin sa VSMMC kay 50/50 ang kahimtang sa masuso.

Aron mahatagan og dinalian nga pag-atiman ang bata, ang banay nisuway sa paghangyo sa usa ka pribadong tambalanan nga duol sa VSMMC apan gibalibaran kay di sila makahatag sa P40,000 ngadto sa P80,000 nga downpayment.

Laing masuso nga si Ayeshe Mae Suson, upat ka buwan taga-barangay Pajac, adunay susamang kaso ni Limpangog ug dungan nga nagpabakuna sa maong adlaw namatay sab niadtong Nobiyembre 11 sa alas 2:20 sa hapon sa samang adlaw ug oras nga namatay si Limpangog. (FVQ)

Gipatik sa mantalaang Superbalita Cebu Nobyembre 15, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments