MIPAHIBAWO si Kong. Samsam Gullas mipahibaw nga sa 2018 mahuman na ang road-widening sa tibuok lungsod sa San Fernando.
Samtang iyang gibutyag nga sa 2019 nalang usab problemahon ang pagtiwas sa road-widening sa siyudad sa Carcar.
Matod ni Gullas nga iyang gipaningkamotan nga maapil na sa 2018 budget ang proyekto ubos sa Department of Public Works and Highway.
Iyang gibutyag nga di moubos sa P200 milyones ang budget alang niini.
Nagkanayon ang kongresista nga kini unya maoy sulbad usab sa kahuot sa dagan sa mga sakyanan pag-abot na sa maong lungsod.
Kini tungod kay lapad naman ang karsada sa siyudad sa Naga ug mogamay pag-abot na sa San Fernando.
Samtang sa siyudad sa Carcar posebling maproblema sila tungod sa mga dagkong punoan sa acacia.
Apan matod sa kongresista nga unya nalang kini niya problemahon sa 2019.
Nasayran nga nasugdan na unta ang pagpalad sa karsada sa Carcar apan nahunong human kini gisupak sa mga environmentalist tungod kay nahadlok silang maguba ang kinaiyahan ug maputol ang century old nga punoan sa acacia. (DRT)