Bidding sa P150 M himuon alang sa pagkuha’g basura | SunStar

Bidding sa P150 M himuon alang sa pagkuha’g basura

Time to read
less than
1 minute
Read so far

Bidding sa P150 M himuon alang sa pagkuha’g basura

Wednesday, December 06, 2017

MOPAHIGAYON og public bidding ang Cebu City Government aron di maputol ang pag­­­hakot sa basura gikan sa trans­fer station paingon sa landfill inig sugod sa Bag-ong Tuig.

Si Ronald Malacora, chairman sa bids and awards committee (BAC), nagkanayon nga gigahinan og P150 milyones sa dakbayan alang sa mosunod nga unom ka buwan gikan sa Enero hangtod sa Hunyo.

Gitug-an ni Malacora nga karong Disyembre 12 ipahiga­yon ang pre-bid conference sa City Hall ug sa samang higayon ang ilang pagbaligya sa bid do­cuments ngadto sa mga service provider nga gustong moapil.

Ang bidding proper ipahigayon sa BAC karong Disyembre 26 aron ilang masayran kon si kinsa ang modaog ug kon mopasar sa post qualification hayan sila ang ideklara nga mananaog ug sila ang mahatagan sa proyekto.

Ang P124 milyones nga kontrata tali sa City Government ug Jomara Konstruckt Corporation gikatakdang mahuman karong Disyembre 31.

Sila ang nakadaog sa gipahigyaon nga bidding niadtong buwan sa Agusto pinaagi sa ilang winning bid nga P1,296 matag tonelada (1,000 kg).

Ang laing mga bidder nga nisal­mot mao ang Pasajero Motor Cor­poration (Pamocor), kinsa ma­oy private hauler niadtong Ene­­ro hangtod Agusto ning tuiga ug sila sab ang private hauler gikan sa barangay paingon ngadto sa transfer station (P56 milyones) ug ang Qui­rante Construction. (PAC)

Gipatik sa mantalaang Superbalita Cebu Disyembre 07, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments