P5T madawat sa mga maestra inay P10T unta: Young | SunStar

P5T madawat sa mga maestra inay P10T unta: Young

Time to read
1 minute
Read so far

P5T madawat sa mga maestra inay P10T unta: Young

Wednesday, December 06, 2017

IPADAYON og hatag sa Cebu Ci­­ty Government ang P10,000 nga financial assistance ngadto sa 5,600 ka mga magtutudlo sa Department of Education (DepEd) Cebu City bisan sa notice of disallowance sa Commission on Audit.

Apan ang maong kantidad kuhaan sa City Government og P5,000 atol sa distribution karong Disyembre 16 aron mahinayhinayan og bayad sa mga magtutudlo ang ilang nakobra sa cost of living allowance (Cola) niadtong 2015.

Ang mga magtutudlo nga mo-retire karon ug sunod tuig di makakobra sa P5,000 sanglit ang P10,000 nga ihatag sa Siyudad kuwang pa nga ibayad sa Cola depende sa gidak-on niini.

Si Konsehal Joy Augustus Young, chairman sa committee on education, niasoy nga nangusog ang Commission on Audit nga ipauli ang Cola nga nadawat sa mga maestra balor og P18,000 sanglit P2,000 matag buwan (sulod sa siyam ka buwan) ang ilang nadawat.

Ang ilang madawat nga P10,000 itingob og kunhod sa ilang Cola unta, apan wa nisugot ang konsehal, inay pahinayhinayan kini og bayad sa mga maestra.

Unang nahunahunaan ang tag P2,000 matag tuig, apan wa mosugot ang City Accounting Office kay molanat pa og siyam ka tuig sa di pa maimpas hinungdan nga nasabutan nila nga tag P5,000 matag tuig ang i-data hangtod maimpas.

Hinuon gipadayag ni Young nga magdepende kini sa mga maestra sanglit di tanan kanila nakadawat sa tag P18,000 kay ang uban ubos ra.

Ang paghatag sa P10,000 nga financial assistance himuon sa City Hal matag tuig sanglit gipaluyohan kini og ordinansa.

Ang pundo kuhaon sa Annual Budget ug dili sa Special Education Fund sama sa Cola.

Nagpasalamat ang chairman sa committee on education nga nahunong nila niadtong 2016 ug 15 ra gikan sa 120 ka mga eskwelahan ang nakakobra sa Cola balor og tulo ka buwan.

Gipasabot ni Young nga mahimo nga ikunhod ang P10,000 sa ilang Cola, apan siya niinsister nga di kini mahimo sanglit nasayod siya sa kahimtang sa mga magtutudlo nga nagkinahanglan og kwarta hilabi na sa Pasko.

Samtang gipadayag ni Supt. Bianito Dagatan sa DepEd Ce­bu City nga nalipay gihapon sila sa lakang nga gihimo sa Siyudad sanglit aduna gihapoy madawat ang mga magtutudlo.

Gipadayag niya nga wa silay mahimo sanglit benepisyaryo ra sila sa programa ug angay hunahunaon sa mga teacher ang positibo nga aspeto.

Gipatik sa mantalaang Superbalita Cebu Disyembre 07, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments