Pagserbisyo kamo: Palma sa kaparian | SunStar

Pagserbisyo kamo: Palma sa kaparian

Time to read
1 minute
Read so far

Pagserbisyo kamo: Palma sa kaparian

Wednesday, December 06, 2017

Mga deacon. Si Cebu Archbishop Jose Palma (tunga) nagpahulagway uban sa mga pari ug bag-ong giordinahan nga mga deacon human sa ilang ordinasyon kagahapon sa Cebu Metrropolitan Cathedral. (Amper Campaña)

BISAN sa nahitabong pagpa­tay sa usa ka pari sa lalawi­gan sa Nueva Ecija, si Cebu Arch­bishop Jose Palma nida­sig sa kaparian nga ipadayon ang pagpangalagad sa simbahang Katoliko ug sa katawhan.

Kini ang pagdasig sa arsobispo human gipusil-patay si Padre Marcelito “Tito” Paez, 72, sa lungsod sa Jaen, Nueva Ecija niadtong Lunes sa gabii.

Ang arsobispo namahayag nga dunay mga pari ug bisan gani mga obispo ang vocal nga nanaway batok sa pipila ka kahiwian sa mga programa sa gobiyerno ug uban pa nga nilapas sa tawhanong katungod sa ubang mga tawo.

Si Palma ang nangu sa ordinasyon sa 10 ka bag-ong mga deyakono sa artsidyosesis sa Sugbo sud sa Cebu Metropolitan Cathedral, siyudad sa Sugbo kagahapon.

Matod niya nisimpatiya sila sa komunidad labi na sa kaparian nga namatay gumikan sa ilang kawsa pagtabang sa mga komunidad nga naapektuhan.

Atol sa misa sa ordinasyon, si Palma nipahinumdum sa bag-ong mga deyakono nga wa sila gitawag nga mahimong “lords” ug “masters” apan mangalagad sa lainlaing mga pamaagi.

Siya nidugang nga dako nga pribilihiyo nila nga gitawag sa pagkapari ning Liturgical Year nga gipahinungod alang sa ministry sa kaparian ug relihiyuso nga mga tawo.

“Nindot kaayo ba nga dili sa rason nga you seek honor, and glory and dignity but the joy of service,” dugang ni Palma.

Ang bag-ong mga deyakono mao sila si Ignatius Arsolon, Al­den John Baran, Gabriel Belino, Mel John Coraraton, Arnel Dionaldo, Richfield Vincent Hernando, Francis Manugas, Jerald Pinay, Jeffmonray Romarate ug Eddie Boy Vega.

Sa 10, sila si Arsolon ug Belino lang ang gikan sa Society of the Angel of Peace (SAP) sa dakbayan sa Talisay samtang ang uban mga seminarista sa Seminario Mayor de San Carlos, siyudad sa Sugbo.

Si Palma nidugang nga human sa unom ka buwan mahimo na sila nga mga pari kon sunod tuig ordinahan sa pagkapari.

Isip deyakono mahimo sila nga assistant sa mga pari sa mi­­­sa, makapangalawat, maka­­sang­­yaw o makawali, ma­ka­bun­­yag ug makasaulog og ka­­­sal apan di misa.

Gipatik sa mantalaang Superbalita Cebu Disyembre 07, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments