Magtiayon gipanigbas patay | SunStar

Magtiayon gipanigbas patay

Time to read
1 minute
Read so far

Magtiayon gipanigbas patay

Thursday, December 07, 2017

DAKONG samad sa liog ang naangkon sa 40 anyos nga ginang nga nga wa nay kinabuhi nga napalgan sa may bung-aw nga dapit sa sitio Katibis, Barangay Guba, sa syudad sa Sugbo alas 10:30 Miyerkules sa gabii.

Unang gituohan nga ang bana ang naghimo sa krimen sanglit nakit-an sila sa ilang mga silingan nga nagtinubagay ug gituohan nga nakainom usab ni.

Apan sa follow up operation sa mga sakop sa Homicide section kagahapon sa buntag, napalgan usab nila ang bana nga patay na ug buak ang ulo ug nakaangkon og dag­hang mga tinigbasan sa lawas.

Ang mga biktima giila nga silang Liesyl Bordadora, 40, negosyante og pagkaon sa maong dapit, ug ang bana nga si Edwin Bordadora, 37.

Unang nakadiskobre sa asawa ang kapuyo sa anak niini nga niagi sa tindahan.

Nabantayan niini nga nagkagubot ang mga butang sa sulod sa tindahan nga maoy hinungdan nga nagduda ni nga dunay dautang nahitabo.

Nakita niya ang pat-ak sa dugo sa dalan nga maoy iyang gisunod ug 10 ngadto sa 15 metros duol sa bung-aw, nag buy-od ang lawas ni Liesyl.

Sa imbestigasyon nga gihimo ni SPO2 Winston Ybañez, unang nakamatikod nga dunay nagbanaw nga dugo sa dalan pipila lang ka metros ang gilay-on sa ilang pinuy-anan.

Gituohan nga pasado alas siete pa sa gabii nahitabo ang krimen sanglit usa sa mga silingan nakabati pa og singgit nga nangayo og panabang.

“Sa pagkakaron wala pa mi suspek kay ang unang gidudahan nila apil gani ang anak nga ang ilang papa ang nagpatay sa ilang mama pero pagkakita namo nga namatay sad ang bana dako ang posibilidad nga naay laing nagpatay nila,” matod ni SPO2 Winston Ybañez.

Dugang ni Ybañez nga dunay kasuko ang killer sa magtiayon tungod sa kadaghan sa mga samad niini.

Mga bukton ni Edwin hapit maputol ug naboak na ang bagul-bagul niini samtang si Liesyl dunay mga tinigbasan sa lawas.

Nagtuo ang mga imbestigador nga giatangan ang magtiayon base sa nakitang tinigbasan sa mga sagbot sa dapit.

Nakakuha ang Crime Scene Investigation Unit og kwarta nga iya ni Liesyl lakip na ang mga gipangompra niini.

“Kon tulis pa ni, wala na unta ang kwarta, naa ra man. Naa man pud ang mga pinalit,” dugang ni Ybañez.

Mopalawom pa sa imbestigasyon ang kapulisan aron motibo masayran.

Gipatik sa mantalaang Superbalita Cebu Disyembre 08, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments