Mga malapason sa trapiko magbantay, Mandaue dunay modernong ekipo

MGA malapason sa balaud sa trapiko sa Mandaue City maglisod na og lusot.

Duha ka bag-ong units nga nag­gamit sa moderno nga tek­nolohiya nga daling ma­ka­bantay sa mga kalapasan sa trapiko maoy gamiton unya sa Traf­­fic Enforcement Agency of Man­daue (TEAM) sa pagdakop sa mga nilapas sa lagda sa trapiko.

Matod ni Glenn Antigua, pangulo sa Team, gisugdan na nila ang paggamit sa Intelligent Transport System (ITS) sayo ning semanaha.

Ang usa ka unit sa camera niini gitaod sa may Maguikay flyover niadtong Martes samtang ang laing usa ka unit anaa gitaod sa sakyanan sa Team ug gisuwayan na nila kini didto sa City Times Square sa miaging gabii.

Sa pakighinabi sa Superba­lita Cebu, si Antigua niingon nga ang camera sa maong sistema makabasa sa plate number sa mga sakyanan, speed limit ug uban pa.

Matod sab ni Mayor Luigi Quisumbing nga nga adunay kapabilidad nga morehistro ang maong sistema og kalapasan susama sa overspeeding ug illegal parking, counterflo­wing, illegal turns ug uban pa.

Ang hulagway nga makuha niini ilabi na sa plate number diretsong ipadala sa Land Transportation Office (LTO).

“License plate recognition can immediately flag vehicles in hot pursuit. They can also detect vehicles that have been car/motornapped. Facial recognition in conjunction with PNP, NBI etc that will flag wanted persons that have passed the cameras,” dugang ni Quisumbing.

Gitataw sab ni Antigua nga dako ang matabang sa kahimanan ilabi na sa pagsulbad sa mga krimen susama sa pagpangawat og sakyanan.

“Ang mahitabo ani, for example, naay carnapped vehicle niya tagaan ta og plate number. Then i-input lang nato ang plate number sa carnap vehicle sa system, then after ana mag-roving to siya unya makit-an niya to ang plate number sa carnap vehicle, mo-alarm na siya. Mo-warning siya nga nakit-an na ang gikawat nga sakyanan maong ma-trace kon asa padung,” matod niya.

Ang sistema nga gitaod sa ilang sakyanan ilabi na sa mga dagkong kalihukan alang sa seguridad niini.

Nanghinaot si Antigua nga ang kahimanan isip parte sa programa nga no-contact ap­prehension dali nga ma­­ka­sikop sa nagpasagad nga motorista. (JPP)