5 ka tuig nga lisensya gisugdan nag printa | SunStar

5 ka tuig nga lisensya gisugdan nag printa

Time to read
1 minute
Read so far

5 ka tuig nga lisensya gisugdan nag printa

Wednesday, January 03, 2018

Printa sa lisensya. Si Land Transportation Office (LTO) Regional Director Alita Pulga (tunga) nangandam pagkuha gikan sa printing machine sa bag-ong lisensya sa driver nga dunay lima ka tuig nga validity nga iya ni Presidential Assistant for the Visayas Michael Lloyd Dino (background, ikaduha gikan sa tuo) atol sa ceremonial printing sa Roll-Out of Drivers License nga gipahigayon sa LTO regional office kagahapon sa hapon. (Amper Campaña)

HINGPIT na nga nagsugod ang Land Transportation Office (LTO) 7 sa pagprinta sa driver’s license nga adunay 5-year validity.

Usa sa una nga nakadawat niini kagahapon mao si Presidential Assistant for the Visayas Michael Dino kinsa usa sa dinapit sa LTO 7.

Nakadawat usab si Cebu 7th district congressman Peter John Calderon sa iyang card.

Matod ni Dino nga way lima ka minutos nga nakuha niya ang iyang card ug mao kini ang gusto ni Presidente Rodrigo Duterte diin mas paspas nga proseso sa paghimo og transaksyon sa gobyerno.

Sukad niadtong Nobiyembre 2, 2016 hangtod Nobiyembre 30, 2017, niabot sa 343,917 ang backlog sa LTO 7 niining mga 5-year card validity nga driver’s license.

Matod ni LTO 7 Regional Director Alita Pulga nga usa ning problema sa internet connection hinungdan nga nadugay ang ilang printing sa cards.

Kinahanglan nga 100mbps o pataas ang internet speed aron walay minuto nga maka­printa sa card.

Dugang niya nga mamahimo silang makaprinta og 300-400 ka cards matag adlaw, diin sugod karong Sabado abli sila alang sa mga aduna’y backlog ug himuon kini nilang matag Sabado hang­tod mahurot og printa ang backlog.

Sa 19 ka LTO satellite offices, walo pa lang ang makaprinta og five-year validity driver’s license tungod kay ang uban wa pay internet connection.

Lakip sa walo mao ang Cebu City Licensing Center, Lapu-La­pu City Extension Office, Da­nao City District Office, Talisay City Extension Office, Toledo ug Carcar City District Office, Ba­yawan City District Office ug DLRO Ro­binsons Dumaguete City.

Kinahanglan nga motunga ang mga wa pa makakuha sa ilang plastic driver’s license tu­ngod kay kinahanglan niya nga ipre­sentar ang iyang resibo, temporary driver’s license ug kuhaan og bag-ong detalye susama sa emergency information ug biometrics ingon man hulagway.

Gipatik sa mantalaang Superbalita Cebu Enero 04, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments