P1.2M nga drugas nasakmit | SunStar

P1.2M nga drugas nasakmit

Time to read
1 minute
Read so far

P1.2M nga drugas nasakmit

Wednesday, January 03, 2018

Drugs. Tulo ka mga suspek nga sila si (gikan sa wala) Mark Anthony Ratcho, Chito Bayno Jr. ug Mary Angelie Espanillo gipresentar uban sa nakuhang drugas. (Alan Tangcawan)

DRUGAS nga balor og P1.2 milyones nasakmit sa Guadalupe police station atol sa gihimo nga buy bust ope­ration kagahapon sa kaadlawon sa Andres Abellana street, Barangay Guadalupe, siyudad sa Sugbo.

Nabalhog sa Guadalupe police station silang Chito Bayno Jr., 30, taga dalan Colon, dakbayan sa Sugbo; Mark Anthony Ratcho, 35, taga sitio Lawis Barangay Lorega; ug Mary Angelie Espanillo, alyas Cynie, 21, taga Filemon street, Barangay Tisa, siyudad sa Sugbo.

Nakuha gikan kanila ang binulto sa gituohang shabu nga motimbang og 105 gramos nga gibana-bana nga moabot ngadto sa P1.2 million sa dihang gilusad ang buy bust operation.

Matod ni Supt. Artemio Ricabo, deputy city director for administration, nga kapin sa duha ka semana nga gipanid-an sa Guadalupe police station ang illegal nga negosyo ni Bayno.

Dihang nakompirmar, gipla­nohan dayon ang operation.

Kini na ang labing dako nga nasakmit nga balor sa illegal nga drugas human gibalik na sa kapulisan ang anti drug ope­ration niadtong unang semana sa Disyembre.

Gipaubos pa sila sa imbestigasyon kon asa gikan ang supply ug kon nalakip ba sa high value target si Bayno sanglit una kining higayon nga milutaw ang ngalan sa mga dinakpan.

“Sa pagkakaron, atoa pang gipaubos sa investigation kon asa sila gikan sa supply sa illegal drugs, although naa na tay initial information nga mao sad na ang isunod nato sa mga anti drug operation,” matod ni Ricabo.

Wa na moluwat og pamahayag ang target sa buy bust operation nga si Bayno, apan ang hinigugma niini nga si Mary Angelie nihimakak nga lakip siya sa illegal nga operation.

Matod niya nga nauban lang siya sa duha sa dihang kalit nga nangabot ang mga pulis.

“Wala koy labot ana, Sir. Nauban lang ko nila ganina pero wala jud ko anang drugs oi,” matod ni Espanillo.

Nakuha gikan kang Bayno ang tulo ka dagkong pakete sa gituohang shabu ug P5,000 nga kwarta lakip na ang P1,000 isip buy bust money, duha ka medium packs kang Racho samtang usa kang Espanillo.

Apan hugot nga gihimakak sa mga kabanay nga apil sa illegal nga negosyo si Ratcho sanglit niuban lang kini sa iyang kaila kay mopalit og washing machine.

Gipatik sa mantalaang Superbalita Cebu Enero 04, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments