Tag-iya og hotel sikop sa buy-bust | SunStar

Tag-iya og hotel sikop sa buy-bust

Time to read
2 minutes
Read so far

Tag-iya og hotel sikop sa buy-bust

Friday, January 12, 2018

Mga suspek. Mga drug suspect nga sila si Baysay Custodio (wala), kinsa nasikop sa buy bust sa GBC Homes , Bulacao, Talisay City; Richard Ngo Go (tunga), nga nasikop sa buy bust sa R. Suites Hotel sa A.C Cortes st., Alang-alang, Mandaue City nga iyang gipanag-iya, ug Benjamin Eugenio Yap (tuo), gipresentar sa Police Regional Office (PRO) 7 kagahapon human sa managlahing mga operasyon. (Amper Campaña)

TAG-IYA og hotel sa syudad sa Mandaue nga giingong nag-sideline sa pagpamaligya og Ecstacy nasikop sa buy bust operation lakip na ang iyang supplier nga usa usab ka negosyante.

Babayeng giingong gaway usab ni Kerwin Espinosa nadakpan usab sa Philippine Drug Enforcement Agency (PDEA) 7.

Unang nasikop sa buy bust operation sa Regional Special Operations Group 7 (RSOG) 7, Regional Drug Enforcement Unit 7, inabagan sa PDEA 7, mao si Richard Go, 40, tag-iya sa R. Suite Hotel nga nahimutang sa A.C Cortes street, Alang-Alang, Mandaue City.

Nasikop siya sulod sa iyang lawak sa iyang hotel nga nakuhaan sa iyang posisyon ang napulo ka mga tabletas nga gituohan nga Blue Telegram Ccstacy nga naila nga party drugs ug usa ka kapsula nga kolor orange nga giila usab nga Orange Amore Ecstacy.

Sa pagsukitsukit, nitug-an si Go nga duna siyay supplier nga taga syudad sa Sugbo nga usa usab ka negosyante, hinungdan nga nilusad sila sa laing operation.

Pipila ka gutlo ang milabay, ilang nadakpan si Neil Benjamin Yap, 33, taga Gochan subdivision, Barangay Quiot, syudad sa Sugbo.

Si Yap nakuhaan usab og laing napulo ka tabletas nga gi­tuohang Ecstacy.

Nakadawat og report ang RSOG 7 nga mamaligya si Go og Ecstacy sa mo check in sa ilang hotel hinungdan nga ilang gipanid-an sa nanglabay nga mga adlaw.

Gawas sa iyang mga kustomer sa iyang hotel, giingong mobaligya usab siya sa mga night club nga dunay party sa mga batan-on.

Matod ni Police Regional Office (PRO) 7 Director Jose Mario Espino nga ning nagsingabot ang mga kalihukan sa Sinulog, mosaka ang supply sa Ecstacy sama sa kaulohan nga maoy himalitan sa kwartahan nga mga batan-on.

“Talagang mayrong Ecstacy dito. Sinabi naman ito ng PDEA that they are monitoring also those that are supplying sa clubs. Ngayon paiigtingin pa natin ang monitoring lalo na ngayong Sinulog, maraming may party,” matod ni Espino.

Gibana-bana sa PRO-7 nga moabot sa dul-an P40,000 ang balor sa Ecstacy nga ilang nakuha sa duha ka mga negusyante.

Gaway ni Espinosa

Samtang babayeng giingong gaway ni Kerwin Espinosa sa pagpayuhot sa illegal nga drugas nasikop sa mga sakop sa PDEA 7.

Ang nasikop giila nga si Baysay Custodio, 29, kasamtangan nga nagpuyo sa GBC Homes, Barangay Bulacao, siyudad sa Talisay, nga nakuhaan og di momenos 250 gramos nga gituohang shabu nga mobalor og P1,250,000.

Matod ni PDEA 7 Director Emerson Margate nga niadtong milabayng tuig pa nilang gipanid-an si Custodio, human siya nalakip sa listahan ni President Rodrigo Duterte nga maoy gaway ni Kerwin nga naglihok sa rehiyon 8.

Si Kerwin mismo ang giingong nga nibutyag sa ngan ni Custido nga usa sa iyang mga gaway.

Giangkon ni Margate nga naglisod sila sa pagdakop kang Custodio tungod sa ka­nunay nga pagbalhinbalhin og lugar sama sa Tacloban ug Metro Cebu.

Apan usa sa ilang mga asset nipahibawo kanila nga nibalik dinhi sa Sugbo si Custodio, nilusad dayon sila og buy bust operation hangtod nga kini nasikop.

Apan hugot nga gihimakak ni Custodio nga gaway siya ni Espinosa ug matod niya nga di iyaha ang illegal nga drugas.

Wa na siya mokomentaryo pa nga ang iyang kapuyo usa ka opisyal sa kapulisan hinungdan nga lisod siyang madakpan.

“Wa man koy bana kapuyo lang wa nako mahibalo asa na siya karon. Ambot kinsa to siya,” sumala ni Custodio nga nagpahiyom.

Kabahin sa iyang kaso ang iya nang abogado ang patubagon niini.

Samtang inahan ug anak nakuhaag binultong drugas sa mi aging hapon sa dan Colon, Brgy.Parian, dakbayan sa Sugbo.

Si Mimbilus Acampado 44, ug iyang anak nga nga si Christian, 20 ang nasikop.

Ang mga ahente sa PDEA7 nakasakmit sa ilang possession og 70 gramos nga shabu.

Gipatik sa mantalaang Superbalita Cebu Enero 13, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments