Holding centers alang sa minor offenders tukuron | SunStar

Holding centers alang sa minor offenders tukuron

Time to read
less than
1 minute
Read so far

Holding centers alang sa minor offenders tukuron

Saturday, January 13, 2018

INAY nga ipriso kauban ang regular detainees, ti­nguha sa Provincial Social Welfare and Development Office (PSWDO) nga dunay kaugalingong holding facility ang mga menor de edad nga makahimo og krimen o kalapasan sa balaud.

Gitug-an ni PSWDO head Ma­rivic Garces nga naandam na ang 8 ka container vans ug sulod niining tuiga, iapud-apod na kini ngadto sa mga distrito aron maoy himuong temporary holding center sa mga minor offender.

Ang 7 ka mga distrito ingun man ang isla sa Camotes ma­kakuha ug tagsa ka refurbished container van ug kini ang ilang paninduton aron mahaom sa gitinguha nga hol­ding area.

Matod ni Garces, buta­ngan kini og gamayng opisina, banyo ug temporary detention facility ug dinhi ibutang mga minor offender samtang dili pa mapasakaan og reklamo o samtang gi-locate ang ilang pamilya o tagtungod.

Dugang niya, dili kinahanglan nga dako ang pasilidad sanglit dili kada adlaw dunay madakpan nga minor offen­der ug kon dunay madakpan, hayan nga iproseso kini dayon ug i-turnover sa hintungdang ahensiya sama sa Department of Social Welfare and Deve­lopment (DSWD).

Nakalatid sa balaud nga ang mga menor de edad nga masakpan dili isagol sa prisohan sa mga hamtong aron dili maimpluwensiya sa paghimo og dugang krimen hinungdan nga ipasa kini sa DSWD.

Giisip nga ang mga bata walay igong kapasidad sa pagba­lanse sa maayo o dili ug nagkinahanglan og giya sa mga ginikanan. Apan kadaghanan sa mga batang buluyagon way ginikanan o buwag. (AZDL)

Gipatik sa mantalaang Superbalita Cebu Enero 14, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments