Ngan sa mga durugista gipakuha | SunStar

Ngan sa mga durugista gipakuha

Time to read
1 minute
Read so far

Ngan sa mga durugista gipakuha

Saturday, January 13, 2018

GIHANGYO ang mga barangay kapitan sa dakba­yan sa Mandaue sa pagsu­mite na usab og bag-ong mga listahan sa gi­dudahang mga personali­­dad sa ilang barangay nga na­­­lambigit sa iligal nga drugas.

Kini maoy nahitabo atol sa command conference sa Mandaue City Police Office (MCPO) sayo ning semanaha nga gitambungan sa mga opisyal sa barangay, Department of Interior and Local Government (DILG), ubang mga opisyal sa dakbayan, Department of Health ug uban pa.

Buot sab sa hepe sa MCPO nga PS/Supt. Roberto Alanas nga masuta ang kasamtangang sitwasyon sa mga drug surrenderer sukad niadtong 2016 hangtod sa milabayng tuig kon hingpit na ba kining nakabalik sa komunidad o nagkinahanglan pa og dugang rehabilitasyon o nibalik hinuon sa dautang bisyo.

Sa maong command conference, nagsabot ang nagkadaiyang mga sector kon unsaon sa pagpalambo sa mga programa sa mga nalambigit sa iligal nga drugas pinaagi sa Task Force Hope.

Sa dihang nahinabi sa mga tigbalita, si Alanas nitug-an nga bisan kon nagpaabot pa sila sa parameters alang sa pagbalik sa PNP War on Drugs, nihinay gyud ang ilang operasyon sa pagkakaron.

Gitagbo sab sa hepe sa iyang unang command conference ang iyang mga hepe sa matag estasyon alang sa ilang paghingusog sa programa sa seguridad sa dakbayan ning tuiga.

Ilang gihimug-atan ang internal security operations, pagtabang sa AFP pagsiguro nga wa gyuy mga rebelde ug terosista nga makahatag og kagubot sa dakbayan.

Lakip sa ilang gihisgutan niadtong Huwebes mao ang anti-criminality campaign nga bisan kon malapas ang city ordinance, ila kining dakpon.

Gisiguro sab sa MCPO nga zero-incident sa krimen ang Mandaue atol sa mga kalihukan sa Traslacion ug Fluvial alang sa pagsaulog sa Sinulog.

Nihimo sab og profiling ang MCPO sa tanang mga nalambigit na sa bisan unsang klaseng kawat sa dakbayan ug mga silingang dapit aron ila kining monitoron.

Gipatik sa mantalaang Superbalita Cebu Enero 14, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments