LUNGSOD sa Moalboal nanalipod sa ilang ordinansahon labot sa pagkolekta og environmental user’s fee gikan sa mga mag-island hopping ilang dapit.
Kini human dunay mga nagpailang indigenous people nga nireklamo batok niini ngadto sa 8888 Citizen’s Complaint Hotline tungod kay giingong wala kini moagi ug konsultasyon sa publiko.
Gimanduan sa Malacañang ang kagamhanan sa lalawigan sa Sugbo pagtubag sa reklamo nga ilang nadawat gikan sa giingong grupo sa mga indigenous people sa lungsod sa Moalboal.
Matod nila, nag-establisar ug ordinansa ang ilang lungsod nga magkolekta ug P100 environmental user’s fee gikan sa mga turista ug pump boat operator nga mag-island hopping, bisan ug wa’y konsultasyon.
Gusto sab nila nga ma-exempt sila sa balayrunon kay matod pa, prebelihiyo kini alang sa mga sakop sa indigenous tribes.
Subay niini, ang Provincial Tourism Office nihimo dayon ug imbestigasyon ug gani nag-atubang na sa usa ka conference ang mga sakop sa nagpailang Tribu Pinatikan ug si Mayor Inocentes Cabaron, kauban usab ang tinugyanan sa National Commission on Indigenous Peoples (NCIP).
Sa maong conference, nasayran nga wala sa listahan sa mga indigenous people sa Pilipinas ang maong grupo.
Matod ni Mayor Cabaron, dunay 26 ka mga indibidwal ang nireklamo apan dunay dili taga Moalboal.
Dugang sa mayor, ang mga nangreklamo nga sagad pump board operator, nasuko lang kaniya tungod sa iyang pagdili kanila nga makabiyahe nunot sa ilang kapakyas pagpa-rehistro sa Marina. (AZDL)