GIPANINGKAMOTAN sa buhatan sa Lapu-Lapu City Treasurer’s Office nga makuha ang 100 porsiyento sa mga business establishment sa dakbayan nga maka-renew sa ilang business permits ning tuiga.
Gipahibawo ni Mayor Paz Radaza nga dili na sila mohatag og extension sa higayon nga molapas sa gikatakda nga deadline karong Enero 20 aron kalikayan nga dugang penalties ang ilang mabayran.
Way rason ang mga tagdumala nga dili makapa-renew sa ilang permits ilabi na nga gihatagan sila og kasayon sa ilang transaction diha sa city hall pinaagi sa “Business One-Stop Shop” permit renewal.
Bukas sab ang city hall sa adlawng Sabado ug Domingo alang niadtong dili makalugar sa ubang mga adlaw gumikan sa kakulian sa ilang trabaho.
Matod pa ni Radaza nga labing taas ang tulo ka oras ngadto sa tunga sa adlaw aron sa pagkompleto sa mga rekisito ug ma-renew sa hingpit ang ilang permits.
Dugang pa adunay umento nga 10 ngadto sa 15 porsiyent sa gidaghanon sa mga estalisemento sa Lapu-Lapu ning tuiga itandi sa miaging tuig nga moabot sa 12,000 ka mga nagkadaiyang patigayon. (FVQ)