PAMILYA sa namatay nga motorista nga nahulog sa lungag sa nagpadayong drainage project sa Barangay Bulacao, dakbayan sa Talisay, way planong mopasakag kaso batok sa kontraktor nga AR Adlawan.
Gibasol sa Department of Public Works and Highways (DPWH) ang kontraktor sa nagpadayon karong drainage project sa barangay Bulacao.
Si Norman Delos Reyes, 29, taga lungsod sa Minglanilla, graduwado sa electrical engineering, namatay human mahulog sa lungag nga gikawot alang sa proyekto niadtong Dominggo sa kaadlawon.
Ang amahan niya nga si Alejo delos Reyes Jr. niingon nga nadesisyonan sa ilang pamilya nga di nalang sila mopasaka og kaso batok sa kontraktor.
“Dili na lang ko. Samok na, mahasol unya pobre kaayo ta. Naa tay trabaho maoy atubangon. Padung gihapon sa settlement. Wala na sad tay mahimo kay disgrasya man,” matod sa amahan.
Niadtong Lunes adunay duha ka mga representante sa AR Adlawan ang niadto sa ilang balay aron makigsabot ug nisaad nga moabaga sa tanang mga galastohan.
Si Norman gikatakda untang mokuha og licensure examination karong tuiga, sanglit damgo niya nga makatrabaho sa gawas sa nasud ug makapalit og yuta ingon man balay sa ilang pamilya. (DRT)