SUGOD karon, istrikto nang ipatuman sa Cebu City Transportation Office (CCTO) ang pagdakop sa mga drayber kansang gimanehong sakyanan molapas sa junction box sa mga nagkuros nga karsada.
Dakpon usab ang mga drayber kinsa molabang sa mga pedestrian lane bisan kon adunay mga tawong motabok.
Si Francisco “Isko” Ouano, operation head sa CCTO, nagkanayon nga ang maong kalapasan sa lagda sa trapiko nalakip sa “reckless driving” nga nalatid sa Executive Order No. 34 ni Mayor Tomas Osmeña.
Ug sama sa nakalapas sa counterflowing, ang mga sakyanan i-impound og 30 ka adlaw sa CCTO didto sa warehouse sa Bigfoot sa South Road Properties.
Ang mga malapason, pabayron og P500 isip administrative penalty hinuon libre ang storage fee nga gihatag kini nga pabor ni Osmeña.
Si Ouano nagkanayon nga usa sa nakahatag og kahuot sa trapiko mao ang pagpaugat sa mga driver sa junction box hinungdan nga olang hingusgan ang “keep intersection clear” diin ang ilang sakyanan naghunong sa linya.
Sa pedestrian lane, naobserbahan ni Ouano nga ang mga tawo pa ang siyagitan sa driver ug kon dili man businahan sanglit gusto silang moagi nga iyang gihulagway nga usa sa hinungdan sa disgrasya.
Matod sa operation chief sa CCTO nga dili na unta kini angay nilang hingusgan sanglit ang mga driver nasayod nang daan nga kini usa ka violation apan daw wala sila masayod nga unta apil man kini sa ilang paglukat og lisensiya.
Si Ouano wala nibutyag kon moplastada ang ilang mga enforcer apan iyang gipadayag nga adto sila motutok sa mga karsada nga adunay daghang violator aron paghatag og leksyon sa malapason.
Samtang, niabot na og kapin 200 ka mga motorsiklo ang ilang nadakpan, 12 ka mga private car, 3 ka taxi ug 3 ka PUJ sulod sa usa ka semana nilang operasyon batok sa counterflow. (PAC)