Hitabo sa convention sa DepEd di food poisoning | SunStar

Hitabo sa convention sa DepEd di food poisoning

Time to read
1 minute
Read so far

Hitabo sa convention sa DepEd di food poisoning

Tuesday, February 13, 2018

Mga tinun-ang Muslim. Ang mga partisipante sa Muslim Students National Educational Convention sa ECOTECH Center sa Lahug, dakbayan sa Sugbo nga nibati og pagpalain sa ilang tiyan atol sa kataposang adlaw sa kombensiyon sa miaging semana. (Alex Badayos)

GIKLARO sa labing taas nga opisyal sa Department of Education (DepEd) sa Central Visayas nga dili food poisoning ang nakaingon sa pagkalandig sa tambalanan sa mga tinun-an niadtong Huwebes sa gabii sa mia­ging semana.

Si Dr. Juliet Jeruta, regional director sa DepEd 7, nibutyag nga base sa findings sa hospital sa 56 ka mga pasyente, ang uban nila may hyperacidity, dunay pipila nga nagka-dyspepsia o wa kahilis sa pagkaon nga ilang gikaon samtang ang uban kay adunay urinary tract infection (UTI).

Ang findings gipakita ni Jeruta ngadto kang Education Secretary Leonor Briones dihang nitambong kini sa kalihukan sa Vicente Sotto Memorial Medical Center diin didto usab si Presidente Rodrigo Duterte niadtong Lunes.

Matod ni Jeruta, base sa mga resulta sa stool exam o ang pag-eksamin sa hugaw sa mga pasyente, way nakita nga kagaw.

“There was no indication, whatsoever about food poisoning...Kasi the laboratory test would not tell lies, makita talaga ‘yan sa stool,” dugang sa director.

Siya nidugang nga base sa mga naobserbahan sa mga organizer, nagsagol na ang giinom sa mga bata gikan sa pagka buntag hangtod sa gabii, brewed nga kape ug fruit juices nga naa sa lata nga naa sa mga station.

Ang director namahayag nga base sa nakita sa suka sa mga bata, dunay nahabilin nga mga pagkaon sama sa chichirya, mais ug barbecue nga manok.

Nadiskobrihan usab sa mga basurahan ang mga cellophane nga naay mga straw ug juice ingon man leche con yelo.

Si Jeruta niklaro nga susama ra sila usab og gikaon nga mga pagkaon sa Ecotech ug kadtong hinatdan sa tulo ka mga hotel nga gisak-an sa mga bata, nga maoy sagad nadala sa tambalanan.

Siya niangkon nga wala na nila makontrolar ang mga bata sa ilang mga gipangkaon gumikan kay duna kini kuyog nga mga chaperone ug guardian. (SCG)

Gipatik sa mantalaang Superbalita Cebu Pebrero 14, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments