Trabaho, klase gipangsuspenso | SunStar

Trabaho, klase gipangsuspenso

Time to read
1 minute
Read so far

Trabaho, klase gipangsuspenso

Tuesday, February 13, 2018

GISUSPENSO ni Mayor Tomas Osmeña ang tanang klase sa pampubliko ug pribadong tunghaan gikan sa elementary, high school ug college sugod kaghapon sa udto sa tibuok dakbayan sa Sugbo gumikan sa baghong Basyang.

Si Osmeña kinsa didto sa Manila kagahapon , nianunsyo pinaagi sa iyang Facebook page aron ipadangat ang iyang mensahe.

“Half day for all schools, all levels, public and private,” matod sa post ni Osmeña nga nakaani og 3.6 sa reactions ug 1,481 ka shares atol sa pagsuwat ning balita.

Si Dr. Bianito Dagatan, school division superintendent, nipatuman dayon sa kamanduan sa mayor sanglit ilawom sa Republic Act 10121, kun Philippine Disaster Risk Reduction and Management (DRRM)Actof 2010 gihatagan niini og gahom ang mayor sa pagsuspenso sa trabaho, klase panahon sa kalamidad.

Si City Administrator Nigel Paul Villarete niisyu usab og direktiba nga half day ra ang trabaho sa Cebu City Government.

Sa Dakbayan sa Talisay, gi­suspenso usab ni Mayor Eduardo Gullas ang trabaho sa Talisay City Hall kagahapon.

Base sa iyang gipagawas nga memorandum nga kutob lang sa ala 1:00 sa hapon ang trabaho aron hatagan og kahigayonan ang mga empleyado sa city hall nga makauli aron masiguro ang ilang kaluwasan.

Ang klase sa tanang mga tunghaan sa Talisay gisuspenso usa.

Samtang ang pangulo sa Talisay City Disaster Risk Reduction and Management Office Alvin Santilana niingon nga padayon ang ilang pag-monitor sa landslide ug mga pagsaka sa tubig sa sapa.

Apan iyang gibutyag nga hangtod kagahapon way pagsaka sa tubig sa mga sapa tungod kay di man usab kaayo kusog ang uwan ug wa pay gitaho nga landslides. (PAC & DRT)

Gipatik sa mantalaang Superbalita Cebu Pebrero 14, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments