Payag natumbahan sa lubi pag-igo ni Basyang; 1 patay | SunStar

Payag natumbahan sa lubi pag-igo ni Basyang; 1 patay

Time to read
less than
1 minute
Read so far

Payag natumbahan sa lubi pag-igo ni Basyang; 1 patay

Wednesday, February 14, 2018

HAMTONG nga lalake namatay kay nadat-ugan sa punoan sa lubi atol sa pagkusokuso sa bagyong Basyang niadtong Martes sa alas 11:00 sa gabii sa Sitio Sangi, Brgy. Madridejos, lungsod sa Alegria.

Si Jenas Aliones, 57, ulitawo, namatay pipila ka minutos dihang nadangat sa tambalanan human gitabang sa kapulisan ug local rescue team.

Si PO2 Rolando Luage, sa Alegria Police niingon nga si Aliones nag-inusara sa payag nga gipuy-an niini.

Gipadayag niya nga natulog si Aliones niadtong higayuna samtang nagkuso-kuso ang bagyong si Basyang.

Subay sa pagsigeg uwan ug kusog nga hangin, naluka ang punoan sa lubi nga tupad sa payag sa biktima.

Sa pagkaluka sa lubi, nadat-ugan ang payag diin didto si Aliones natulog.

Ang mga silingan nga nakakita daling nitawag sa kapulisan.

Sa pag-abot sa dapit, gitabang kini kay nagginhawa pa.

Dihang gidala sa tambalanan, wa magdugay namatay si Aliones tungod sa grabing kadaot sa likod sa iyang lawas.

Ang habagatang Sugbo mao ang apektado kaayo sa bagyong Basyang diin didto miagi ang sentro niini.

Si Aliones pa ang bugtong gitaho nga patay human sa pagkuso-kuso sa bagyo nga nagdala og kusog nga uwan niadtong Lunes sa gabii dihang niagi sa Central Visayas. (GPL)

Gipatik sa mantalaang Superbalita Cebu Pebrero 15, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments