SI Cebu City Mayor Tomas Osmeña nahasol ug nadisturbo sa subling pagtumaw sa mga professional killer kinsa iyang gihulagway nga way kahadlok sa balaod.
Kini human gibanhigan patay si Ronda Vice Mayor Jonah John Ungab niadtong Lunes human nitambong sa iyang court hearing batok sa kaso nga giatubang sa iyang kliyente nga si Kerwin Espinosa.
“It appears the shooting was done by a cold blooded professional killer. That’s what bothers me,” padayag ni Osmeña.
Iyang gibasehan nga duha ra ka mga bala ang gitira sa gunman ngadto kang Ungab nga pulos naigo sa ulo.
Kon nakurat ang mga opisyal sa Kapitolyo, opisyal sa kalungsoran ug Integrated Bar of the Philippines, wa kini nakapakugang sa mayor sa dakbayan sa Sugbo.
“Your mayor is not shocked anymore. Things like that don’t shock me, “ matod ni Osmeña.
Ang mayor wa na usab mohatag og direktiba ngadto sa Cebu City Police Office (CCPO) kinsa maoy nag-imbestigar sa kaso sanglit iyang gipadayag nga nahibawo na ang mga awtoridad sa ilang trabaho.
Si City Director Joel Doria niumol na og Task Force Ungab aron mosulbad sa krimen.
Matod ni Osmeña, di niya personal nga kaila si Ungab kinsa maoy ikaduhang abogado sa mga Espinosa nga gipatay.
Unang gibanhigan mao si Atty. Rogelio Bato sa dakbayan sa Tacloban niadtong Agusto 2016.
Samtang gikondina sa Cebu City Council ang pagpatay kang Ungab diin upat ka mga abogado nagpadayon sa ilang pag-practice.
Si Konsehal Sisinio Andales nipasar og resolution ug niawhag sa kapulisan sa pagsulbad sa krimen ug pagpanalipod nga dili na masubli ang maong matang sa pagpatay. (PAC)