SA mosunod nga tulo ka buwan magsugod na og biyahe ang lainlaing klase sa moderno nga mga public utility jeepney nga makita nga naka-display sa Plaza Sugbo, atubangan sa Cebu City Hall sugod kagahapon.
Ang mini road show gipasiugdahan sa Land Transportation Franchising and Regulatory Board (LTFRB) 7 sa pakigtambayayong sa kagamhanan sa siyudad sa Sugbo sa pagpatuman sa Public Utility Vehicle Modernization Program.
Pipila ka mga operator nga nahinabi sa Superbalita Cebu nakauyon sa mga moderno nga PUJ units nga naka-display, apan nipadayag sila nga mahal ra ang presyo sa matag usa.
Si Ahmed Cuizon, regional director sa LTFRB 7, nibutyag nga daghang operators ang nipakita og interes nga mopalit sa maong mga PUJ units nga nagagikan sa Minglanilla ug mga siyudad sa Talisay ug Sugbo.
Sumala ni Jojo Montecillo, general manager sa Mabolo Transport Cooperative, nga nindot ang mga modernong PUJ units nga naka-display apan bug-at ra ang presyo.
Matod niya, kon utangon ang usa ka unit, kinahanglan mobayad sila og P28,000 matag buwan nga mahal ra alang sa ilang mga miyembro.
Moabot sa 110 ang aktibo nga mga miyembro sa ilang kooperatiba nga may 600 ka units ug kon hingpit nang ipatuman ang PUV Modernization Program, 200 na lang ang makabiyahe.
Si Allan Tapia, tsirman sa National Confederation of Transportworkers Unity (NCTU), niingopn kon kaniadto P400,000 hangtod P500,000 ang puhunannon sa pag-operate og PUJ unit, karon P1.2 milyones na ang labing minos nga gikinahanglan sa Cooperative Development Authority aron maka-operate og moderno nga PUJ unit. (SCG)