LTFRB 7 manawat na og aplikasyon alang sa TNVS, apan limitado lang

SUGOD karong adlawa, ma­­­nawat na og mga apli­kasyon ang Land Transportation Franchising and Regulatory Board alang sa Transport Network Vehicles Service (TNVS) units sa Cebu aron maisyuhan og prangkisa.

Apan dali giklaro ni LTFRB 7 Director Ahmed Cuizon nga kadto lang mga narehistro sa mga sistema sa Transport Network Companies, Grab ug Uber, hangtod sa Hulyo 2017, ang ilang dawaton nga mga aplikasyon.

Matod niya, matag semana, 100 ka mga aplikasyon ang ilang dawaton, 50 alang sa Grab ug laing 50 alang sa Uber, o 20 kada adlaw diin tag 10 ang matag usa.

Ang director nitataw u­­­sab nga kutob lang sa tulo ka TNVS units ang labing daghan nga itugot nila sa usa ka pamilya.

“So, kon naay mga existing karon, lima o 10 kabuok, tulo ra gyud kabuok. Kon usa dili pwede magdugang,” pasabot ni Cuizon.

Sumala niini nga ang mga TNC na ang nagpahibawo sa mga TNVS operators kon kinsa ang prayoridad nga i-iskedyul karong semanaha, aron dili magdasok sa ilang buhatan.

Si Cuizon namahayag tan-awon sa mga TNC ang record sa ilang mga sakop sama sa kinahanglan nga aktibo kini sa nangaging tulo ka buwan ug taas ang ilang pagserbisyo.

“Ug nag-part-time lang og usa o duha ka oras, unya dunay laing unit nga nagbiyahe og pito o 10 ka oras, patagaan gyud siya og prio­rity. Ang ato man ani nga mas makaserbisyo sa pasahero,” pagpasabot sa director sa pakighinabi sa Superbalita Cebu.

Sumala ni Cuizon kapin na lang sa 200 ka TNVS units sa Sugbo ang aktibo gikan sa 740 ka units nga unang narehistro sa mga sistema sa TNC atol sa tagal nga ilang gihatag. (SCG)