WALA pa gihapon magamit ang 2nd ug 3rd floor sa Cebu Provincial Hospital (CPH) Balamban tungod sa isyu sa bayranan sa proyekto tali sa Kapitolyo ug sa kontraktor niini.
Nagsabotsabot na hinuon karon ang duha ka habig aron masulbad kini. Gani gitinguha na karon nga mabutngan na usab kini karon ug kaugalingon niini nga Intensive Care Unit (ICU).
Sentro sa gihimo nga Servicio Karaban sa Kapitolyo kagahapon ang CPH-Balamban. Libreng medical, surgical ug dental services ang gihatag ngadto sa mga residente sa Balamban ug mga silingan niining lungsod sa 3rd district.
Samtang gihimo ang kalihukan sa gawas sa hospital building, nagpadayon ra usab ang normal nga operasyon sa tambalanan. Duna kini OB-Gyne section, dunay operating ug emergency rooms, outpatient department, laboratory ug uban pa.
Apan kining tanan, anaa lang sa ground floor sa edipisyo ug dili pa gihapon operational ang 2nd ug 3rd floor niini.
Partial payment lang ang nahatag sa Kapitolyo sa kontraktor alang sa proyekto human masuta nga wala diay pagtugot sa Hunta Probinsiyal ang pagsulod ug kontrata tali niini ubos sa niaging administrasyon.
Gipadayag hinuon ni Davide human niabot sa korte ang isyu, nagkauyon ang duha ka habig nga mohimo ug compromise agreement ug apil niini ang hingpit nga pagbayad sa Kapitolyo sa balance nila ngadto sa kontraktor bugti sa pag-turnover na usab sa proyekto ngadto sa gobiyerno.
Ang wala magamit nga bahin sa CPH-Balamban mao unta ang butngan sa hospital ward aron maka-atiman sa mas daghang pasyente. (AZDL)