Wild parties, bikini open show gidii sa Bantayan sa Holy Week

PANAHON sa Semana Santa, ang Provincial Women’s Com­mission (PWC) hugot nga nipahimangno labot sa law-ay nga mga pasunda­yag sa mga resort.

Gawas niini, nanawagan ang Kapitolyo sa mga resort owner nga panalaminan ang nahitabo sa isla sa Boracay ug mamahimong conscious sa pag-proteher sa kalikupan.

Giklaro ni PWC co-chairman, Bise Gob. Agnes Magpale, nga dili did-an sa ka­gam­hanan ang mga party panahon sa Semana Santa diha sa nagkadaiyang tourst destinations sa Sugbo, ilabi na sa isla sa Bantayan.

Apan gihimug-atan sa o­­pisyal nga kinahanglang si­­guruon nga dili kini “wild” ug dili usab “indecent”. Buot pasabot, dili mahimo ang mga law-ay nga pasundayag sama sa bikini open.

Nagtuo si Magpale nga dili kalikayan ang lingaw-lingaw atol sa Semana Santa tungod sa taas nga bakasyon ug sa kadaghang tawo nga modagsang sa nagkadaiyang destinasyon.

Hangyo lang niya nga respetohan lang usab ang mga relihiyosong kalihukan, ilabi na sa Biyernes santo, diin gitimaan ang kamatayon ni Hesukristo.

Gisalig ni Magpale ngadto sa lokal nga kagamhanan sa Sta. Fe ug sa uban pang lungsod sa Bantayan island, ang paghimo ug monitoring sa mga kalihukan sa ilang dapit sa semana santa.

Gawas sa pagbantay sa mga law-ay nga show o party, gustong masiguro sa Kapitolyo nga mahimong conscious ang mga turista sa pag-proteher sa kalikupan.

Nakaabot kang Magpale ang report sa hilabihan nga kahugaw nga baybayon sa Bantayan sa miaging holy week ug dili siya gusto nga mahitabo kini pag-usab.

Matod niya, kinahanglang panalaminan sa mga LGU ug sa mga resort owner ang nahitabo sa Boracay island, nga planong ipasira karon aron ipaubos sa rehabilitasyon. (AZDL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph