DUHA ka mga sakyanan nga gipanag-iya sa siyudad sa Sugbo ang gikatahong nakit-ang gigamit alang sa personal nga lakaw sa lungsod sa Carmen, lalawigan sa Sugbo niadtong Sabado.
Si Ernest Herrera, usa ka concerned citizen, mi-post og hulagway sa Facebook diin makita ang mga red plate sa sakyanan nga naka-park sa Cebu Safari and Adventure Park nga nahimutang sa Carmen.
Ang mga sakyanan adunay plate number nga SKN-781 ug SKZ-910.
Gikompirmar ni Ronald Malacora, pangu sa General Service Office (GSO) sa Cebu City Government, nga ang mga nahisgutang sakyanan gipanag-iya sa kagamhanan sa siyudad sa Sugbo.
Matod ni Malacora nga ang sakyanan nga adunay plate number nga SKN-781 giisyu sa opisina ni Konsehal Alvin Arcilla sa Cebu City North District samtang ang SKZ-910 giisyu sa kapitan sa Barangay Cambinocot.
Nahibung siya nga nganong naabot sa Carmen ang sakyanan nga ang giisyu sa Cambinocot nga patrol vehicle man unta kini sa mga barangay tanod.
Dugang ni Malacora nga ang Cebu City Legal Office na ang bahala sa legal action nga pagahimuon.
Sa pagkakaron ilang gihuwat ang pagpasabot ug ang pagsumiter og trip ticket sa mga nahisgutang personalidad. (Christine Joyce Secuya & Nova Leah Carbon, CNU Interns)