8-anyos namatay sa dengue

LAIN na usab nga bata ang nakalas gumikan sa dengue dinhi sa dakbayan sa Sugbo.

Ang namatay mao ang 8 anyos nga batang lalake diha sa sityo Beina, Barangay Duljo Fatima.

Si Bebe Paculaba, barangay health worker (BHW) sa lugar, nagkanayon nga nakabsan sa kinabuhi ang bata alas 11 sa gabii niadtong Huwebes.

Gibutyag ni Paculaba nga niabot na og duha ka mga semana ang hilanat sa bata apan wa mo-report didto sa ilang barangay ang mga ginikanan ug wa usab dad-a sa tambalanan hilabi na sa Cebu City Medical Center (CCMC).

Gidugang sa BHW nga ang ilang barangay wa gyud magkuwang sa pagpahibawo sa ilang mga lumolupyo kabahin sa maong sakit sanglit nanghatag pa man gani sila og leaflets kabahin sa unsaon paglikay niini.

Iyang gihulagway nga ang ilang kapitan nga si Elmer Abella mangunay pa gani og suroy ngadto sa kabalayan nga sakop sa ilang barangay aron sa pagsuta ug pagpahinumdom sa ka tagi barangay kabahin sa maong sakit.

Usa ka barangay tanod nga nahinabi sa Sun.Star Superbalita nagkanayon nga ang mga ginikanan nagmagahi gyud pagdala sa bata sa tambalanan gumikan kay nahadlok sa gastuhanan.

Apan si Pacaluba niingon nga di man unta angay mabalaka ang mga ginikanan sa bata sanglit aduna may grupo sa mga langyaw ilang dapit nga motabang kanila hilabi kon malandig sa tambalanan.

Ang kamatayon sa usa ka bata maoy ika 15 karong tuiga sukad sa Enero.Mas ubos kini kon itandi sa 28 nga nangamatay sa susamang buwan sa miaging tuig. (PAC)