Anak, 10, napusil sa papa, patay

SANGKO sa langit ang pagpamahay sa amahan human aksidente niya napusilan patay ang iyang 10-anyos nga anak lalake niadtong Martes sa gabii.

Giingong nagduwa-duwa sa armas ang hubog nga suspek ug mihana og tion sa armas ngadto sa bata nga naghigda sa katre niadtong higayona.

Igo na lang sa pagpanglugmaw sa luha ang suspek nga si Wilson Ompad, 41, usa ka mananagat nga taga-sityo Song-on, barangay Pangan-an isla sa Olanggo sakop sa dakbayan sa Lapu-Lapu.

“Wa gyud ko kahibawo ug nganong nahitabo to,” asoy ni Willy nga nahinabi sa Sun.Star Superbalita.

Sa pasiunang imbestigasyon sa Crime Against Persons Desk (CAPD) sa Lapu-Lapu City Police Office nga niadtong Martes sa mga alas 6:00 sa gabii nakurat ang mga kasilinganan sa dihang usa ka sipa nga buto sa armas ang milanog.

Giangkon sa amahan nga hubog siya niadtong tungora sanglit gisaulog sa iyang kalipay human nga giabagan ni City Mayor Paz Radaza ang pagpatambal sa usa sa iyang masakiton nga anak.

Ang insidente nahitao sud sa panimalay sa suspek diin naghigda na sa katri ang iyang 10-anyos nga anak aron unta sa pagkatulog.

Pulong pa ni Willy iyang gikuha ang iyang tinaguang .38 caliber revolver diin iyang gipakita sa iyang 7 anyos nga anak lalake nga kuryusong nagtan-aw sa maong armas.

“Ako ra nga gituyok ang barrel unya kalit lang nga nibuto sa dihang ako na untang ibalik sa hunos,” dason sa suspek.

Apan sukwahi sa mga pamahayag sa ubang sakop sa kabanay niuli sa ilang panimalay ang suspek nga gihulagway nga hubog dayon kuha sa iyang armas dayon giduwaan ug gitiontion ngadto sa nagpahuway nga anak hangtod nga nibuto.

Dali nga gitabang ang biktima og sa dihang naglawig paingon sa mainland Lapu-Lapu aron dad-on sa tambalanan nakabsan sa kinabuhi ang ika-upat nga anak sa suspek samtang nitahan sa iyang kaugalingon ang amahan.

“Wa ko kasabot sa akong gibati. Guol sa tanang guol,” dugang ni Willy.