Bantay Dagat, illegal fisher namatay

SAKOP sa Bantay Dagat sa lungsod sa Argao ug usa ka gikatahapang illegal nga mangingisda nangamatay dihang ang ilang mga grupo nagkapinusilay alas 12:00 sa miaging tungang gabii sa kadagatan sa Barangay Talaga, lungsod sa Argao, Sugbo.

Si Alvin Galeos 39, minyo, taga Barangay Poblacion, namatay sa iyang samad pinusilan sa dughan gikan sa wa matinong kalibre sa armas.

Apan mga alas 9 sa buntag kagahapon sa kadagatan sa Barangay, Coro lungsod sa Dalaguete, napalgan ang patay nga lawas sa illegal nga mananagat nga si Joel Quisagan, taga Barangay Sangat, lungsod sa San Fernando, Sugbo.

Si Sr. Insp. Wilbert Parilla, nga nahinabi sa Sun.Star Superbalita, nagkanayon nga nailhan ang tulo ka mga kauban niining mga mananagat nga sila si Sherwin Manayon, 30, minyo; Lindo Villarin, 26; Edmund Quisagan, 24, pulos taga Barangay Sangat, San Fernando ug ang laing usa ka kauban nga wa mailhi.

Matod ni Parilla nga si Galeos, uban sa iyang mga kaubang Bantay Dagat nga sila si Francisco Manayan, Christian Allawan, Teodorico Allawan, Veronico Birondo nipahigayon og reconnaissance sa kadagatan sa dapit mga alas 10 pasado sa gabii nga duol sa fish sanctuary.

Ang pumboat nga green, nga dunay rebite nga puti nga gisakyan sa upat ka mga suspek nakit-an nang daan sa mga Bantay Dagat mga alas 10:00 sa gabii.

Apan mga alas 12 pasado sa gabii, badlungon unta sa mga Bantay Dagat ang mga illegal nga mananagat nga nagdala og compressor apan kalit lang silang gipamusil.

Ang mga kauban ni Galeos nag-iyahay sa paglayat sa dagat, samtang ang biktima naigo sa pagpusil apan bisan kon samdan nakabawos ug napusilan usab si Quisagan.

Dali kaayong nakasibat ang mga suspek luwan sa ilang pumboat dala si Quisagan nga samdan.

Si Galeos nipahibawo sa iyang mga kauban nga naigo siya hinungdan nga wa na sila makahimo pa sa paggukod kay gidali nila sa pagdala sa daplin sa dagat aron dad-on sa tambalanan apan wa na mopitik ang pulso niini.

Si Parilla nga nahinabi sa dySS Super Radyo nibutyag nga dunay slug nga nipilit sa pumboat sa nga gisakyan sa Bantay Dagat nga ilang nakuha nga posibling dipektuso ang ubang bala nga nagamit sa mga suspek.

Atol sa ilang gihimong follow-up operation sa lungsod sa Dalaguete diin nipaingon ang mga suspek, ila kining nailhan human napalgan ang lawas ni Quisagan nga diha pa sa pumpboat nga green nga nag-utaw-utaw nga nakit-an sa mga mananagat sa Barangay Coro, Dalaguete.

Sa impormasyon nga ilang nakuha, ang lawas ni Quisagan gibiyaan nilang Manayon, Villarin ug Edmund Quisagan.

Ang tulo daling gipangita kagahapon sa mga operatiba sa Argao Police Station sa lungsod sa San Fernando.

Gibutyag ni Parilla nga ang tulo ka mga suspek nagpakaaron ingnon nga nalunod ang pumboat nga ilang gisakyan nga nag-utaw-utaw sa kadagatan didto sa Barangay Coro mao nga naggamit lang sila og mga galon.

Dihang nakit-an sila sa mga residenti sa lugar nga mga mananagat usab, gitabangan ug gidala sila sa police station sa Dalaguete.

Nakugang ang ubang mga residenti dihang ang pumboat nga ilang nabangalan dunay lawas.

Dihang ilang gi-report sa kapulisan, nasuta nga mga kauban sa mga suspek ang namatay.

Nasuta sa blotter sa Dalaguete Police Station mga alas 7 sa buntag nagpa-blotter ang tulo ka mga suspek nga nalunod ang ilang gisakyang pumpboat.

Human niini namauli sila.

Gikompirmar usab ni Parilla nga si Quisagan ubos sa probation sa korte human gikasuhan sa Municipal Trial Court (MTC) sa Argao niadtong 2005 labot sa illegal fishing apan sila si Enad, ug Borbon giabswelto.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph