Bata wa paliti, naghikog

TRESE anyos nga batang lalake naghikog pinaagi sa paghigot og pisi sa iyang liog tungod sa kahiubos nga wa paliti og laptop sa iyang inahan aron magduwa-duwa sa mga online game sa Internet sama sa iyang mga higala.

Si Aristotle John Gako, taga Sitio Lukbon, Barangay Poblacion East, natungha sa Central Elementary School sa Barangay Poblacion, naghikot og pisi sa iyang liog sa ikaduhang andana sa ilang balay sa miaging gabii.

Si PO2 Rommel Gako, ig-agaw sa nagpakamatay, imbestigador sa Moalboal Police Police Station nga nahinabi sa Sun.Star Superbalita, nagkanayon nga ang inahan ni Aristotle nga si Odonia 73 nag-andam sa ilang panihapon dihang nahitabo ang insidente.

Ang bata legal nga sinagop ni Odonia.

Giingong si Aristotle nisaka sa ikaduhang andana sa ilang balay apan dihang gitawag sa iyang inahan aron unta pagpanihapon wa na kini motubag.

Hinungdan nga si Odonia nangita sa iyang anak ug gisaka sa ikaduhang andana.

Nasurprisa kini dihang maoy nisugat sa iyang duha ka mga mata nga nagbitay ang iyang anak.

Nanawag siya mga silingan aron mangayog pakitabang sa pagkuha sa iyang anak nga nagbitay nga wa nay panimuot aron dad-on sa tambalanan apan uwahi na ang tanan tungod kay gideklarar sa mga doctor nga dead-on-arrival (DOA).

Si PO2 Gako nibutyag nga naguol ang bata dihang wa kini mapaliti og laptop nga iyang gipangayo sa iyang inahan.

“Nihangyo man gud ni siya nga magpapalit og laptop sa iyang mama aron pareho na siya sa iyang mga higala nga dunay laptop nga makaduwa-duwa labi na kay gusto niini sa online games sa Internet sama sa Dota,” sumala pa ni PO2 Gako.

Ang bata gikataho nga spoiled usab kaayo nga kon unsay gusto, paliton usab niini.

Nakasab-an kini sa inahan, gidibdib niini maong sa kaguol naghikog.

Gawas niini sila na lang duha sa iyang inahan sanglit ang amahan niini dugay na usab namatay.

Hinuon bisan paman niini gisugyot sa kapulisan nga ipa-autopsy ang lawas niini aron pagwala sa pagduda nga dunay foul play ang kamatayon niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph