Bayot gipatay sa 2 nga nagmotor

BAYOT nga masahista gipusil patay samtang padulong mopauli sa ilang pinuy-an gikan nga nagmasahe uban sa laing bayot sa miaging gabii sa Sityo Libo, Brgy. Tayud, lungsod sa Consolacion.

Si Randy Hiyas, 28, taga Brgy. Maribago, dakbayan sa Lapu-Lapu namatay tungod sa samad pinusilan sa iyang dughan human gipusil sa duha ka wa mailhing killer nga nagmotorsiklo.

Si PO2 Jovani Babano, desk officer sa kapulisan sa lungsod sa Consolacion nga nahinabi sa Sun.Star Superbalita nagkanayon nga si Hiyas kuyog sa iyang silingang masahista nga si Richie Intera, 27, sa wa pa mahitabo ang krimin.

Matod pa ni Babano nga naglakaw ang duha padulong mopauli sa ilang boarding house nga giabangan diha sa may Sitio Paknaan, sa nahisgutang barangay dihang kalit lang nibutho ang duha ka killer nga nagmotorsiklo nga nagsunod kanila.

Kalit lang nga nihunong ang motorsiklo ug ang angkas niini nikanaog dayon sa way daghang pangutana gipusil ang biktima tumong sa dughan.

Nakadagan pa si Hiyas bisan samdan uban si Intera.

Nakapangayo pa sila og panabang sa usa ka security guard sa usa ka furniture firm sa dapit.

Gidali sa pagdala sa tambalanan si Hiyas apan gideklarar sa mga doctor nga dead-on-arrival.

Wa makuha ang numero sa motorsiklo nga gisakyan sa duha ka mga mamumuno tungod kay ngitngit ang dapit.

Dali kining nakasibat dala ang duha ka mga cell pone sa biktima ug higala niini.

Matod pa ni Babano nga blangko pa gyud ang ilang mga imbestigador sa pagsubay sa motibo sa krimin ingon man description sa mga killer.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph