Bugti sa babaye?

HEPE sa Naga police station girelibuhan tungod sa giingong pag-release sa usa ka trak nga coco lumber nga nasakmit.

Nakadawat og reklamo si Cebu Provincial Police Director Erson Digal nga gipasibat ang trak bugti sa usa ka “maanyag nga babaye” nga gihatag sa negusyanteng nanag-iya sa mga kahoy.

Si Digal nirelibo kang Supt. Anthony Bagarinao, hepe sa Naga police station, sa miaging semana. Gilakip sa imbestigasyon ang iyang lima ka mga sakop.

Si Digal nga nahinabi sa Sun.Sun.Star Superbalita, niingon nga nakadawat siya og text message sa miaging simana labot sa giingong illegal nga transaction nila ni Bagarinao ug sa negusyante.Ang ngan sa negusyante gipugngan samtang wa pa makuhai sa iyang habig.

Niadtong Nobembre 3, sa alas 5:40 sa hapon, usa ka truck nga puno sa ginabas nga lubi, ingon man kahoy nga tipolo, nadakpan nila ni Bagarinao ug mga kauban nga nagpahigayon og checkpoints sa Barangay Langtad.

Apan sa pagkabuntag sama sa usa ka tagulilong, kalit lang nahanaw ang truck nga wa gyud mabantayi sa mga police nga duty usab niadtong gabhiuna.

Gibutyag ni Digal nga si Bagarinao, uban sa negusyanteg, giingong nag-inom sulod sa usa ka videokihan sa Barangay Tabunok nga nagbuntag.

Ang impormanti nipahibawong kang Digal nga gidalitan ang police official og babaye.

Sa iyang kalagot, gipahimo niyag progress report si Bagarinao nianang pagkabuntag sa sunod adlaw.

Nibutyag kini nga nahanaw ang maong truck nga puno sa kahoy hinungdan nga gipa-explain. Iya kining girelibuhan nga floating ang status samtang magpadayon ang imbestigasyon.

Nagduda siya nga dunay gyoy di maayong nahitabo atol sa panag-uban ni Bagarinao ug sa negusyante.

“Ako lang una siyang ibutang dinhi sa kampo samtang ipa-ubos sa imbestigasyon. Grave misconduct ni ang iyang kaso. Hayan matangtang pa siya sa serbisyo niini,” sumala pa ni Digal.Gipahibawo gilayon niya si Mayor Val Chiong nga iyang relibuhan si Bagarinao samtang magpadayon ang imbestigasyon sa pagkahanaw sa kahoy, samtang si Sr. Insp. Rolando Yballe maoy gibutang nga officer-in-charge (OIC).

Si Digal daling nimando kang Sr. Insp. Rubin Cuizon, hepe sa Provincial Investigation and Detection Management Branch (PIDMB) sa pag-imbestigar kang Bagarinao.

Lakip sa gipaubos sa imbestigasyon sila si PO2 Jesus Bontila, PO2 Leonilo Banguardia Jr., PO2 Ronald Caño, PO1 Niel Villaceran ug desk officer nga si PO2 Miguel Castañeres.Si Cuizon nga nahinabi sa Sun.Star Superbalita niila sa negusyante nga si Henry Calderon, taga Barangay Lamacan, lungsod sa Sibonga, ingon man kang Ruben Miranya sa Task Team, kawani sa PCA.

Matod pa ni Cuizon nga ang Isuzu Elf (GJK-187) gimaniho Marcelo Juezan Jr., taga Barangay Campanga, lungsod sa Barili nadakpan sa checkpoint niadtong Nob. 3 sa hapon diha sa Barangay Langtad Naga, samtang mag-deliver sa coco lumber paingon sa Tabunok, Talisay.

Si Miranya, nga nahinabi sa Sun.Star Superbalita niangkon nga siya maoy nihagad sa pagkig-inom kang Bagarinao sa plaza.Samtang nag-inom, nanawag sa cell phone ug niduol ang negusyante ug niapil.

Human sa ilang pag-inom didto sa Naga, nibalhin silag inom sa usa ka viedeokihan sa Tabunok, diin ang negusyante ug si Bagarinao nagtagsa sa babaye.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph