WARNING sa Facebook users!
Angay nga magbantay sa paggamit sa social networking site kay dunay mga tawo nga nang-hack sa mga account ug nigamit niini sa ilang pagpangilad aron makakwarta.
Usa ka babayeng taga Sugbo nga nagtrabaho sa travel agency nakapadala gyud og kuwarta sa iyang gituohang bayaw nga babaye, apan diay ang iyang gikakukabildo sa Facebook mao na diay ang hacker.
Uwahi na siyang nasayod niini kay nakapadala na siya og P8,000 sa hacker. Ang maong paagi sa pagpangilad nakabiktima sab sa paryente ni Jonalene Lirazan.
Gisaysay ni Lirazan sa Sun.Star Superbalita nga niuli ang iyang sister-in-law nga si Esterlina Gurion gikan sa gawas sa nasod.
Wa kini magdugay dinhi, nibalik ra usab kini niadtong Enero 27 gumikan sa trabaho nga naghuwat sa U.S.
Usa ka adlaw human sa paglarga ni Gurion, ni-open siya sa iyang Face-book aron sa pagtan-aw sa iyang account.
Didto iyang nabasa nga nga nipadala og mensahe si Gurion nga nagkanayon “hi, hope your not busy at all.” Didto nagsugod ang ilang tinubagay pinaagi sa message sa account.
Ang hacker nihangyo kaniyang manghuwam kay wa siya makada og kuwarta kay duna siyay bayranan nga iPhone balor og P8,000. Ang hacker nangutang kunohay sa ginganlan og Emerson D. Oman nga adunay cell no.0926767804, nagpuyo San Recardo, Baguio City ug siya una ang pabayron sanglit nakalimot siya og bayad ug ilisan ra kini.
Nituman siya sa sugo niini ug gipadad-an niya og P5,300 nga gipangayo sa nagpatuong si Gorion pinaagi sa LBC diha sa Fuente Osmeña niadtong Enero 28, sa pagtuo nga tinuod ang transaksyon.
Ang iyang laing bilas nga si Lerry Lirazan mao nay nisulti kaniya nga siya iilad sanglit susamang ngan ang nitatak sa Facebook ni Arlene Densing nga iya ra usab nga ig-agaw, taga Mandaue City, nga nakapadala og P3,000 sa susama gihapong modus operandi.
Di kay sila ra ang gibiktima.Sa samang paagi, ang ig-agaw sa bana ni Esterlina Gurion nga si Helen Aficial hapit makuhai og $200 sa nagpaila gihapong Esterlina nga nisulting ipadala usab ang mao nga kuwarta kang Oman.
Apan kini nasanta gumikan ra usab sa Facebook sa iyang ig-agaw nga lahi ra sa original Facebook account sa nagpaila nga Gurion.
Sa samang higayon, ang notadong ngan nga Emerson D. Oman nigamit na usab og laing account nga si Cynthia Lucero aron pag-ilad kang Rosalinda Rosal, kinsa nakapada sab og P3,000 pinaagi gihapon sa LBC. Susamang address ang gida ni Oman.
Si Lirazan nagtuo nga gi-hack ang Facebook account sa iyang bilas sa ginganlan og Oman.
Si Jonalene nibutyag nga nailad gyud siya sanglit pag-click niya sa ngan ni Esterlina Gurion nga maoy iyang ka chat adunay nakasuwat nga ‘no information available’ apan sa orihinal nga account sa iyang bilas iyang nasuta nga duna kiniy mga detalye sa pagkatawo ug mga hulagway.