`Gi-rape’ sa uyoan

NIDANGOP sa kapulisan ang usa ka 15-anyos nga dalagita kinsa giingong gilugos sa makadaghang mga higayon sa iyang uyoan sa Sitio Sario, Brgy. Bulacao, dakbayan sa Sugbo.

Nagtinggakol sa detention cell sa Station 7 ang 34-anyos nga suspek (ngan gipugngan) lumad nga taga Aguada, Placer, Masbate human masikop sa kapulisan.

Ang giingong pagpanglugos nahitabo mismo sa balay sa biktima, kinsang ngalan gipugngan ning mantalaan.

Sigon sa pasiunang imbestigasyon sa kapulisan, nasayran nga ang pagpanglugos dugay na nahitabo apan karon lang nakasulti ang biktima sa iyang amahan.

Si PO3 Alvin Montebon desk officer sa Pardo Police Station, dihang nahinabi sa Sun.Star Superbalita nagkanayon nga ang amahan sa biktima midangop sa kapulisan dihang nahibaw-an niini ang nahitabo sa iyang anak.

Nidugang si Montebon nga ang Miscellaneous Team nga gipangoluhan ni PO3 Fabius Belleza kuyog sa amahan miadto sa gitrabahoan sa suspek nga usa ka printing press sa dan Junquera, Brgy. Cogon Ramos ug didto gisikop ang suspek.

Gipaubos na sa medical check up ang biktima apan sa Enero 3 pa mahibaw-an ang resulta samtang ang kapulisan andam mopasaka og kaso batok sa suspek sunod semana. (Marissa N. Abadies & Decemay P. Padilla, USJ-R Masscom Interns.)