Iti na say giawayan

WAY katapusan ang panagbangi nila ni Gobernador Gwen Garcia ug Bise Gobernador Greg Sanchez.

Ning higayona ang isyu na usab sa iti sa manok ang ilang gilalisan karon nga suma pa sa bise gobernador maoy iyang gidudahan nga nakaingon sa pagkuyanap sa tipos sa lungsod sa Alegria ug kalibanga sa dakbayan sa Danao.

Si Garcia nihagit kang Sanchez nga pamatud-an ang iyang pasangil nga ang iti sa manok maoy hinungdan sa typhoid outbreak ug diarrhea outbreak sa duha ka mga lugar.

Sa Danao City ug Alegria, nasuta na nga hugaw sa tawo ang nakaingon sa outbreak nga nasulbad na.

Ang gobernador nga nahinabi sa mga tigbalita kagahapon nagkanayon nga kon mapamatud-an sa bise gobernador nga ang iti sa manok maoy hinungdan, iyang paundangon ang mga negosyante pagpamuhi og mga manok sanglit makadaut man kaha kini sa panglawas.

Matod niya nga nangita lang og paagi ang bise gobernador aron mabalhin ang atensyon sa mga tawo ug ma-promote ang iyang produkto nga Lactopafi.

“Today’s jolting headlines attacking chicken manure is an obvious attempt diverting public attention from the very obvious plunder blunder of Mr. Saavedra,” suma pa ni Garcia dihang nahinabi sa mga tigbalita.

Iyang gidugang nga buot lang ni Sanchez nga sagupon sa mga mag-uuma ang organic nga abuno nga gihingusog niini sanglit iti sa manok man ang libreng gi-apod-apod sa Kapitolyo ngadto sa mga mag-uuma sa kalungsuran.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph