KONDUKTOR sa PUJ gipatay sayo kagahapon sa buntag sa eskina Sunny Hills subdivision sa Barangay Talamban, dakbayan sa Sugbo.
Nagsagol lang ang mga alegasyon sa mga tawo sa dapit kalabot sa hitabo.
Dunay nisulti nga dunay tawo nga niduol ug nidunggab sa biktima nga nanawag og pasahero samtang ug dihay nisulti nga pasahero ra sa biktima ang nidunggab kaniya.
Mga pasahero sa PUJ nga rotang 13C naglumba pagpanggawas sa sakyanan human nila makita ang pagka hagba ni Gerland Iba, 32, alias “RR,” taga Kantabako, siyudad sa Toledo, kilid sa sakyanan.
Ang driver sa PUJ nga si Jurel Parame, kinsa giimbestigar sa kapulisan, niingon nga nihunong sila sa dapit aron sa pag-pick up og mga pasahero.
Iyang nakita ang biktima nga nikanaug sa sakyanan ug diha sa kilid nagsigi og panawag og pasahero paingon sa siyudad.
Usa ka lalake nga nagsul-ob og itum nga t-shirt, nag shorts ug dakuon ang panglawas, niduol sa biktima ug dayong dunggab kaniya sa makadaghang mga higayon.
Sa dihang natumba na ang biktima, nidagan ang suspek paingon sa subdivision.
Ang kapulisan sa Talamban ninglusad og hot pursuit operation, apan wa na nila madakpi ang suspek.
Ang biktima nakaangkon og daghang mga samad dinunggaban sa nagkadaiyang parte sa iyang lawas.
Si SPO3 Rey Cuyos sa Homicide Section nagkanayon nga subay usab sa ilang nakuhang inpormasyon nga gikan sa sulod sa PUJ ang suspek, mikanaug ug nidunggab sa biktima.
Sa pagka karon, di pa matino sa kapolisan ang posibling motibo sa pagpatay sa biktima.
Ang hitabo nakamugna og grabeng pagkabara sa trapiko sa Talamban area.