P300 mil madala unta, negusyante misukol

NADAKPAN ang usa sa upat ka mga tawo nga ningsuway pagtulis sa usa ka negusyante kagahapon sa buntag diha dalan M.J. Cuenco, Dakbayan sa Sugbo.

Apan napakyas ang mga tulisan sa ilang tuyo kay ang biktima nisukol man kanila.

Ang nagtingkagol na karon sa silda sa Waterfront police station giila sa kapulisan nga si Rey Camisa Lahoylahoy,35, nagpuyo sa sityo Lawis, Brgy. Babag, Lapu-lapu City.

Samtang ang ilang gitulis mao si Bryan Yap Teson, 36, taga Brgy. Basak San Nicolas, tag-iya sa Cebu Fair Marketing nga nahimutang sa M.J Cuenco.

Si SPO3 Rene Serna, imbistigador sa Police Station 3 nga nahinabi sa Sun.Star Superbalita, nagkanayon nga alas 8 sa buntag sa dihang niabot si Teson sa iyang buhatan.

Ni-parking kini sa iyang sakyanan daplin sa dalan apan gisundan sa wa mailhing mga tulisan ug gitionan siya sa og .38 caliber revolver.

Apan nisukol si Teson hinungdan nga nahitabo ang lamok-lamok ug nailog sa biktima ang pusil gikan sa usa sa mga tulisan.

Si Teson nga adunay dala nga Swiss knife daling nikuha sa iyang hinagiban ug nidunggab sa tulisan.

Hinuon si Serna wa na makadetalye sanglit ang tulisan nga samdan nakasibat.

Gidugang ni Serna nga human sa lamok-lamok ang kauban sa nakasibat nga tulisan nga si Lahoylahoy maoy niduol sa sakyanan sa negusyante ug dayon nikuha sa messenger bag nga adunay sulod nga P300,000 nga cash.

Apan way swerte kay dali usab nga nakatabang ang mga empleyado sa Cebu Fair Marketing ug gitabangan paghasmag si Lahoy-lahoy nga niresulta sa pagkasikop niini.

Dali sab nga nakaresponde ang Field Training Police nga si PO1 Ejan nga maoy beat patrol police sa dapit.

Si Serna nagkanayon nga base sa ilang pag-imbestigar sa suspek, kini nitug-an kon si kinsa ang pangalan sa tulo niya ka mga kauban nga nakasibat.

Apan nagdumili ang imbistigador sa pagtug-an sa Sun.Star Superbalita sanglit ang iyang mga kauban nagpadayon pa sa ilang hot pursuit operation.

Sa pagkakaron, ang suspek natanggong sa station 3 samtang si Teson gidala sa hospital sanglit nasamad man ang iyang kamot dihang nag-inilogay sila sa tulisan sa iyang Swiss knife.

Gipadayag ni SP03 Serna nga sa Lunes ilang pasakaan og kaso si Lahoylahoy ug ang tulo nga nakaiskapo lakip na ang pagdala og armas sa suspek nga karon anaa sa kapulisan isip ebidensya. (PAC)