ANIA na usab sa Sugbo karong adlawa si Pres. Benigno “Noynoy” Aquino III. Ikaduha kini niyang higayon sa pagbisita sukad siya nilingkod sa Malacañang human sa piniliay niadtong Mayo.
Si Aquino gikatakda nga motambong sa duha ka mga kalihokan nga gimugna sa duha ka mga dagkong kompanya nga nagbase nganhi sa Sugbo diin siya ang mangulo sa pagsubo niini.
Ang unang kalihokan nga tambungan sa presidente alas 10 karong buntag mao ang paghingalan sa barko nga gihimo sa Tsuneishi Heavy Industries (Cebu) Inc. nga nahimutang sa West Cebu Industrial Park, Special Economic Zone, sa Barangay Buanoy, Balamban.
Iyang bunyagan ang barko sa ngalang “Tenshu Maru” dayon himuon niya ang seremonyas uban silang Erramon Aboitiz, presidente ug CEO sa Aboitiz Power Corp., Jon Ramon Aboitiz, Makoto Kambara, Gob. Gwen Garcia, Kong. Pablo John Garcia ug PEZA director general Lilia de Lima.
Kining M/V Tenshu Maru maoy labing dako nga barkong gihimo sa Pilipinas sa Tsuneishi nga maoy ika-upat nga labing dakong ship builder sa tibuok kalibutan.
Human sa kalihokan sa Balamban, subhan ni Aquino ang bag-ong nadugang nga hotel sa Sugbo nga mao ang Radisson Blu Hotel Cebu nga anaa nahimutang tupad sa SM City sa North Reclamation Area, dakbayan sa Sugbo nga nahuman sud sa tulo ka tuig.
Kuyog sa presidente ang tag-iya sa hotel nga si Hans Sy uban sa iyang pamilya, Grant Gaskin, general manager sa hotel, Kong. Rachel del Mar, Kong. Tomas Osmeña ug Mayor Michael Rama. (SCG)