ULO sa mag-uuma nag-kawilkawil na dihang nakit-an sa iyang silingan human gigulgol og sangot sa wa mailhing tawo niadtong Sabado sa buntag sa hilit nga dapit sa Barangay Cambanog, lungsod sa Dumanjug.
Ang biktima mao si Billy Bejona, 40, ulitawo ug nagpuyo sa nahisgutang dapit, kinsa nakit-an nga gigulgol na ang liog niini ug apit nang maputol nga nagbuy-od sa kasagbutan.
Si P/Insp. Rolan Aliser, hepe sa Dumanjog police station nga nahinabi sa Sun.Star Superbalita, nagkanayon nga si Brgy. Kapitan Marcos Sombilon sa nahisgutang dapit maoy nipahibalo ngadto kanila labot sa nadiskubrihan nga lawas sa tawo.
Matud ni Insp. Aliser nga usa ka Lito Camaso maoy nakakita sa lawas ni Bejona nga nagbuy-od diha sa daplin sa barangay road sa nahisgutang lugar.
Sa gihimo pakisusi sa kapulisan sa nahitabo sa krimen, ang sangot nga gigamit sa paggulgol sa liog sa biktima ilang nakit-an nga gilabay mga 58 ka tiil ang gilay-on gikan sa lawas sa biktima.
Wa masuta sa kapulisan kon unsay motibo sa krimen ug kinsa ang mamumuno nga nihimo sa linuog nga pagpatay. (Guam P. Logroño)