Wa na makugang nga si Palma ang ihulip kang Vidal

WA masurprisa ang mga lider sa Simbahang Katoliko sa Sugbo sa pagkatudlo kang Palo, Leyte Archbishop Jose S. Palma isip maoy mosunod nga arsobispo sa Archdiocese of Cebu hulip kang Ricardo Cardinal Vidal.

Si Msgr. Esteban Binghay, Episcopal vicar sa Archdiocese of Cebu, nitug-an nga usa si Bishop Palma sa tulo ka mga kandidato nga gipilian nga mohulip sa puwesto ni Cardinal Vidal.

Ang laing duha ka mga kandidato naglakip nila ni Jaro, Iloilo Archbishop Angel Lagdameo ug Cotabato Archbishop Orlando Quevedo.

Si Binghay nitug-an sa Sun.Star Superbalita nga duha ka mga tuig ang nakalabay usa siya sa gikonsulta sa Papal Nuncio kon kinsay irekomendar isip mosunod nga mahimong Arsobispo sa Sugbo nunot sa pagretiro ni Cardinal Vidal.

Iyang giasoy nga wa siya magdahom nga si Palma ang pilion sanglit mas taud-taud man si Lagdameo nga nakaalagad sa Sugbo ug mas suod usab ni Cardinal Vidal itandi kang Palma.

Apan dako og kahigayunan nga si Lagdameo posibleng mao usay ihulip sa puwesto sa moretiro nga si Manila Archbishop Gaudencio B. Cardinal Rosales kinsa nag-75 anyos na usab karong tuiga.

Sumala pa ni Binghay nga bisan og di kaayo taas ang pag-alagad ni Palma sa Sugbo nasuod usab kini sa mga pari dinhi ug daghan usab kinig nahimong kaayohan.

Si Binghay dako ang pagdayeg sa umaabot nga arsobispo sa Sugbo tungod sa pagka maayong tawo niini.Iyang gihulagway ang maong alagad sa simbahan nga soft-spoken, maayong lider ug tigsangyaw sa pulong sa Ginuo ug attractive personality.

Si Palma nahimong bise presidente sa Catholic Bishops Conference of the Phils. (CBCP) Visayas Chapter sa nangaging katuigan. Karong Enero , gikatakdang moasumir sa bag-ong puwesto si Palma. (SCG)