Gilas sulod sa Q’Finals

NAKASULOD sa quarter-finals ang Smart RP Gilas human nila gipangpukan ang Japan, 83-76, sa miaging gabii sa 26th FIBA-Asia Championship For Men sa Wuhan gymnasium sa China.

Midominar si naturalized Marcus Douthit sa ilawom nga bahin ug nimugna kini’g 25 puntos ug 18 rebounds.

Ang Gilas mikontrolar gyud sa ilawom nga maoy nakaalkontra sa grabeng tira sa gawas sa Japan nga nakamugna og 12 ka three-point shots.

Gilupig sa Gilas ang Japan sa rebound, 44-31, unya gidominar sa mga Pinoy ang pinuntosay sa ilawom, 52-20.

“In a game like this, the team that controlled the boards, controlled the game. The Philippines beat us inside,” asoy ni American coach sa Japan nga si Thomas Wisman sa usa ka artikulo nga nakuha sa www.gmanews.tv.

Ang Gilas, nga ningposte sa ikaduha nilang sunodsunod nga kadaugan, hayag na kaayong makasulod sa top two sa Group F.

“We’re happy with the win. We played as a full team for the first time,” asoy ni Gilas Serbian coach Rajko Toroman.

“We’re in a good situation right now and expects Chinese Taipei to be our opponent in the quarterfinals. And that was our goal before this game.”

Sa gawas, si pointguard Jimmy Alapag maoy gisaligan sa Gilas diin nakamugna siya og 15 puntos lakip na niini ang tulo ka three-point shots.

Maayo sab nga nakaduwa si Marcio Lassiter ug miamot sab kini og 15 puntos.

Labing importante, maayo kaayong nakadepensa si Lassiter sa labing sinaligan sa Japan nga si Takuya Kawamura, kinsa nalimitahan lang og 12 puntos sa 3-of-11 shooting.

“We stopped Kawamura, that’s one of the key in the game,” pasabot ni Toroman.

“We played good in the second half by dominating the rebounds. At the end of the day, I think we deserve to win the game.”

Ang higanteng si Joji Takeuchi maoy nangulo sa Japan pinaagi sa iyang 22 puntos.

Sa presstime, ang Gilas padayon pang nakigsangla sa Syria kagabii.