Veco andam makig-settle sa bayranan sa Waterfront

ANDAM i-withdraw sa Visayan Electric Company ang kasong kriminal nga gipasaka niini batok sa Waterfront Cebu City Hotel and Casino niadtong Lunes.

Samtang ang Energy Regulatory Commission padayon nga modungog sa reklamo nga gisang-at sa Waterfront batok sa Veco human ang naulahi giingon nga nibahad nga putlan og koneksyon sa kuryente ang maong hotel.

Si Ethel Natera, communications manager sa Veco sa pakighinabi sa Sun.Star Superbalita kagahapon nibutyag nga bukas sila sa posibleng himuon nga amicable settlement tali sa Waterfront.

Matod niya andam sila mo-withdraw sa gipasaka nga kaso kon ang hotel mobayad sa kantidad nga P168,699,560.86 isip differential billing sa nagamit niini nga kuryente sukad niadtong Agusto 2007 hangtod sa Pebrero ning tuiga.

Si ERC Visayas Director Atty. Joel Bontuyan niingon nga nag-ung-ong karon ang reklamo sa Waterfront batok sa Veco ngadto sa ilang ulohang buhatan.

Iyang gibutyag nga duna untay negosasyon ang duha ka habig apan wa magkasinabot sa bayran nga kantidad nga wa na niini gibutyag kon pila.

Iyang gitino nga magpadayon ang hearing sa maong reklamo, gani karong Biyernes gitakda ang expository presentation sa duha ka habig.

Matod ni Natera nga giunhan sila sa hotel pagduso og reklamo sa ERC aron mapugngan ang ilang tinguha nga maputlan ni og koneksiyon sa kuryente kon dili mobayad sa ilang gipangayo nga kantidad.

Iyang gibarugan nga ang korte lang ang dunay hurisdiksyon sa ilang gipasaka nga kaso sanglit ang ERC usa lang ka regulatory body.