PBA semis sugdan

Duwa karon
6:45 p.m. – Rain or Shine batok Powerade

HUMAN sa taas-taas nga bakasyon, mobalik ang aksyon sa Philippine Basketball Association (PBA) 37th Philippine Cup pinaagi sa pagsugod sa best-of-seven semi-finals series.

Karong gabii, unang magsangka ang Rain or Shine Elasto Painters batok Powerade Tigers sa kaugalingon nilang semi-finals series sa Cuneta Astrodome.

Ugma sa gabii sa samang venue, sugdan sab sa defending champion Talk N’ Text Tropang Texters ug Petron Blaze Boosters ang kaugalingon nilang series.

Ang Elasto Painters ning-abante sa semis pinaagi sa pagsilhig sa twice-to-beat nilang kontra nga mao ang Bgry. Ginebra Gin Kings sa quarter-finals series.

Sa ilang bahin, mas impresibong nakasulod sa semis ang Tigers kay ilaha mang gipalagpot ang no.1 team nga mao ang twice-to-beat nga B-Meg Derby Llamados sa quarter-finals.

Bisan sa kuyawng gipakita sa Tigers sa quarter-finals, si Elasto Painters coach Yeng Guiao masaligong molampos gyud ang iyang mga batos sa series.

Kon mahitabo, mao unya kini ang labing unang higayon nga maka-sulod sa finals ang Elasto Painters sukad sa pagsulod niini sa liga niadtong 2006.

“I feel really good the way we’re playing. I think we can take on Powerade in a seven-game series,” batbat ni Guiao.

Labing seguro, ang Elasto Painters magtutok gyud sa ilang depensa ngadto sa labing pambato sa Tigers nga si Gary David, kinsa mao gyu’y nagtiklo sa Llamados sa quarter-finals.

“We have to check on David with our tall and quick players.The way he is playing, we have to find a way to ice those hot hands,” batbat ni Guiao.

Batok sa LLamados, si David nag-average og 34.5 puntos. (Frank Calapre)