Casimero masaligon gyud nga mahimong world champion

Saturday, January 28, 2012

DILI ikalimod nga adunay higayon nga gikonsiderar si Argentinian Luis Alberto Lazarte nga usa sa labing ku­yaw nga boksidor sa iyang division apan sa edad nga 40, gituohang natay-an na sab gyud og gamay ang kanhi world champion.

Kini maoy angayang pahimuslan ni Filipino Johnreil Casimero (15-2, 9KOs) sa iya unyang pagpakigbatok sa beteranong si Lazarte (49-10-2, 18KOs).

Have something to report? Tell us in text, photos or videos.

Ang duha ka mga boksidor mag-abot karong Pebrero 10 sa Buenos Aires, Argentina aron ilugan ang bakanteng International Boxing Federation (IBF) light flyweight title nga gibuhian ni Ulises Solis.

“I would say he (Casimero) has an 80 percent chance of winning because he has prepared for so long and his opponent is older,” matod ni SGG Promotions head Sammy Gelloani, kinsa maoy promoter ni Casimero.

Human sa iyang 2nd round TKO nga kadaugan batok kang Roemart Sentillas niadtong Oktubre 15 sa Hoops Dome sa Lapulapu City, si Casimero nag-training na gyud alang sa usa ka world title bout.

Ang maong kadaugan maoy nakapabalik sa moral ni Casimero, kinsa sulod sab sa pito ka mga buwan nga wala miaway human sa iyang back-to-back nga kapildihan sa iyang world title fights batok nila ni IBF flyweight champion Moruti Mthalane ug kanhi World Boxing Organization (WBO) light flyweight king Ramon Garcia.

Gipasabot ni Casimero nga sa miagi niyang world title fights, kuwang ang iyang preparasyon apan iyang gipaneguro ning higayuna nga sakto na gyud kaayo ang iyang pagpangandam.