Donaire naglagot gihapon ni Vazquez

Tuesday, February 7, 2012

GIPABUHAGAY ni No­­­nito “Filipino Flash” Donaire nga wala siya’y respeto sa tawo nga iyang gilupig ning bag-uhay lang – si Puerto Rican Wilfredo Vazquez Jr.

Nipakita na man tuod og respeto si Vazquez kang Donaire dihang pa­ingon na silang mag-away ibabaw sa ring niadtong Dominggo, apan wala gihapon na­wala ang kapungot ni Do­naire sa gibuhat sa iyang kontra.

Have something to report? Tell us in text, photos or videos.

Sa usa ka press conference pipila ka mga adlaw sa wala pa ang away, diriyot magkasumbagay sila si Donaire ug Vazquez.

Dihang nag-atubang ang duha aron magpahulagway atol sa maong presscon, gituyok ni Vazquez ang kawo ni Donaire. Mibawos sab dayon si Donaire pinaagi sa pagtangtang sa kawo nga gisul-ob ni Vazquez.

Nanglupad ang mahait nga mga pulong human niadto nga niresulta sa hapit gyud nga pagnagsukmagay.

Human gilupig ni Donaire si Vazquez, ang nakig-amigo na dayon ang Puerto Rican boxer
ngadto sa Pinoy niyang kaatbang.

“Sabi n’ya, business lang to. May respeto ako sa ‘yo, gusto ko lang ma-excite ang fans,” asoy ni Donaire, kinsa milabni na sa bakanteng WBO super bantamweight title.

“Okay, whatever. Wa­la na akong respeto sa ‘yo kasi, not only you dis­respected my country, not only you disrespected my wife and my team, you disrespected boxing as well. Whatever, wala na akong pakialam sa ‘yo. Basta ang alam ko panalo ako, world champion ako.”

Sa wala pa ang away, nagkasumpaki sab sa Twitter ang mga asawa sa duha ka mga boksidor.
Nagpaalim

Sa laing bahin, gipahibalo ni Donaire nga kasamtangan siyang nagpaalim sa angol sa iyang wala nga kumo nga iyang nasinati human sa ilang away ni Vazquez ug taastaas ang panahon nga makalas niini.

“Kailangan kong mag-heal muna,” matod ni Donaire, kinsa nakaangkon sa angol sa sayong bahin pa lang sa away.

Naangol na sab ang wala nga kumo ni Donaire sa sayong bahin sa iyang boxing career ug milanat kini’g duha ngadto sa tulo ka mga buwan una naalim sa hingpit.

Hinuon gitataw ni Donaire nga dili kini makapugong kaniya a­ron magpadayon sa iyang pag-ensayo.

“Didiretso ako ng training kahit masakit. Ibang training na lang siguro, takbo or something,” pasabot ni Donaire.

Gipasabot ni Donaire nga naapektuhan gyud ang iyang away gumikan sa angol apan bisan pa niini, nakamaneho gihapon siya pagdaog.

“Hindi ko akalaing ganito mangyayari sa kamay ko, kaya hindi ako agresibo,” matod niya.

“Minsan ko lang sinu­suntok ‘yung left hook, but wala naman akong ma­gagawa.”