Migallen: Judge nga pilde gana

Tuesday, February 7, 2012

WAY lalis, mora og tsunami nga mikusokuso ang laing garbo sa mga Pinoy nga si Nonito “The Filipino Flash” Donaire ni Puerto Rican fighter Wilfredo Vasquez Jr. sa ilang WBO superbantamweight fight niadtong Dominggo didto sa Alamodome sa San Antonio, Texas.

Sukwahi sa gipanghambog ni Vasquez nga iyang atakihon si Donaire sa sayong mga rounds, siya na hinuon ang nagsige og depensa nga hapit di mobuhi sa iyang mga kinumo.

Have something to report? Tell us in text, photos or videos.

Gikan sa unang round ngadto na sa ikalimang round, daw sa gihimo ni Donaire og punching bag si Vasquez. Alang nako, ang round 7 ug 8 mao ray nakuha sa Puerto Rican boxer kinsa sa round 9 natumba human maigo sa left cross the Filipino Flash.

Sa nahabiling tulo ka mga rounds, wa mawad-i sa paglaom sa Vasquez pero igo ra gyud intawon siya sa paglingolingo nga maigo sa mga jab.

Sa last round nakigsinukliay sa ilang mga kinumo ang duha apan si Vasquez ang perming masungag tungod sa kaabtik sa mga kamot ni Donaire.

Duha ka mga judges ang mitali og 117-110 sa ilang scorecard pero ambot og unsay nakita sa laing judge nga si Ruben Garcia nga iya man hinuong gipadaog sa iyang scorecard si Vasquez, 115-112.

Kon kaagresibo ang atong hatagan og kredito, si Donaire man ang permi moataki. Kon igo sab sa kumo ang hisgutan wa may porsiyento nga gidag-an si Vasquez kinsa mao pa gani ang na-down sa ikasiyam nga round.

Sa iyang gihimo wa kalikayi ang mga daghang pagduda.

Dunay nagkanayon nga kon wa siya mabayri, basin og paryente ni siya ni Vasquez. Wa sab isalikway ang posibilidad nga basin og nasipyat siya og tali sa iyang scorecard nga imbis pabor kang Donaire didto niya mabutang sa kang Vasquez.

Wa siguro ni siya magtan-aw sa away ug nalingaw kining nagtan-aw sa iyang cellfone. O kaha ang legs sa mga round girl maoy nakakuha sa iyang atensiyon. Posibli sab nga basin og perdi gana nga duwa ang naandan niya.

Daog man tuod si Donaire, pero angay sab ning imbestigahon sa mga kadagkuan sa WBO kay kining ingon aning klase nga judge mao ra unyay magpatay sa boksing.

Saydlayn: Unsa ni ka tinuod nga dunay mga barangay officials nga milibot sa ilang barangay nga nagpahibawo nga duol na kuno tubig sa tsunami nga maoy nakapataranta og maayo sa mga tawo. Ka-iresponsabli.

Belated happy birthday diay sa atong higala nga si Atty. Jinggo Quijano, sports columnist sa Sun.Star Cebu.

(junmigs0622@yahoo.com)