Donaire, no.2

Wednesday, February 8, 2012

MISAKA sa no.2 nga puwesto sa ESPN super bantamweight ratings si Nonito “Filipino Flash” Donaire human niya nasakmit ang World Boxing Organization (WBO) super bantamweight title.

Si Donaire, kinsa mibuhi sa iyang bantamweight world titles aron mokampanya sa mas taas nga timbang, milupig kang Puerto Rican Wilfredo Vazquez Jr. pinaagi sa split decision aron angkunon ang bakanteng WBO super bantamweight belt niadtong Dominggo sa Alamodome sa San Antonio, USA.

Have something to report? Tell us in text, photos or videos.

“Donaire, one of boxing’s pound-for-pound stars, gave up his bantamweight belts and moved up to junior featherweight to claim a vacant belt February 4 by dismantling former titlist Wilfredo Vazquez Jr.,” pasabot ni Dan Rafael sa ESPN.

Si Donaire mao na karon ang nagsunod kang Japanese boxer Toshiaki Nishioka, kinsa maoy nag-una sa ranking ug tag-iya sa World Boxing Council junior featherweight belt.

Nailugan og puwesto ni Donaire si Cuban fighter Guillermo Rigondeaux, kinsa maoy hari sa World Boxing Association (WBA) title.

Sa Ring Magazine ratings, si Donaire nagpabilin sa no.3 sunod nila ni Nishioka ug Rigondeaux.

Sa laing bahin, taas kaayo ang TV ratings sa panag-away nila ni Donaire ug Vazquez.
Nakakuha kini og 32.6 percent rating sa Total Philippines samtang 15 percent sa GMA 7 basi sa Kantar Media – TNS National Household Ratings.

Narehistro ang labing taas nga rating sa South Luzon diin nakakuha kini og 49.7 percent sunod ang Mindanao nga adunay 44.6 percent dayon sa Visayas nga adunay 40.1 percent.

Nakarehistro kini og 29.2 percent sa Metro Manila, 27.3 percent sa Mega Manila, 24.8 sa Suburbs, 28.7 sa North Luzon samtang sa ubang bahin sa Luzon, nakapatik kini og 33.5 percent.