Casimero bag-ong world champion

Saturday, February 11, 2012

MIRESULTA sa grabeng riot ang panagharong nila ni Filipino Johnriel “Quadro Alas” Casimero ug Argentinian Luis “Mosquito” Lazarte kagahapon diin midaog ang Pinoy pinaagi sa 10th round TKO sa Mar del Plata sa Buenos Aires, Argentina.

Si Casimero, kinsa lumad nga taga Ormoc City, Leyte apan nagpuyo na karon sa Mandaue City, Cebu, miangkon sa bakanteng International Boxing Federation (IBF) light flyweight title ning maong kadaugan.

Have something to report? Tell us in text, photos or videos.

Sa 9th round, kaduha gitumba ni Casimero (16-2, 10KOs) si Lazarte (29-11, 18KOs) nga nagsugod pinaagi sa makusog nga kumo ni Casimero nga miigo sa apapangig ni Lazarte.

Sa 10th round, gitumba na sab pagbalik ni Casimero si Lazarte. Nakabangon ra hinuon gihapon ang naulahi apan gitiwasan kini’g kulata ni Casimero hangtod nga giundang na sa referee ang away.

Human niini, ang kampo ni Casimero nga naglakip nila ni international promoter Sammy “Don King” Gelloani ug trainer Pingping Tepora gibato na sa nga Argentianian fans og mga botelya sa tubig, mga bangko ug uban pa.

Wala pa gyud natagbaw, nanaka na gyud sa ring ang Argentinian fans ug gipanukmag sila si Gelloani, Tepora ug Casimero.

Ang asawa ni Gelloani nga si Cora, kinsa naa dinhi sa Sugbo ug nakadawat dayon og tawag gikan sa iyang bana human sa away, misaysay ning mantalaan kabahin sa gipang-asoy ni Gelloani sa ilang panag-estorya.

“Nabun-og gyud kuno sila pero wala ra man hinuon kuno’y sakit. Ugma pa na nila ma-feel ang sakit,” batbat ni Cora.

Makita sa video sa www.youtube.com nga nanga-igo gyud sila si Gelloani, Tepora ug Casimero sa gipanglabay nga mga bangko.

Si Gelloani nabarag gyud og ka­diyot dihang nasukmagan ang iyang ulo sa usa ka Argentinian fan.

“Nakaikyas ra lagi si Casimero kay gitago man siya sa iyang amigo nga Argentinian sa ilawom sa ring,” asoy ni Cora.

Matod ni Cora nga ang referee sa away nga si Eddie Claudio nahidangat gyud sa ospital gumikan sa bun-og nga naangkon niini.

Nauwang lang ang kasamok dihang nangabot na ang mga pulis.

Nasayran nga ang kampo ni Casimero gikuyogan na gyud og mga pulis paingon sa ilang hotel nga ilang gisak-an ug gibantayan sa gyud sila hangtod nga makalarga.

“Eskortan man sab kuno sila’g mga pulis paingon sa airport,” batbat ni Cora.

Sa taho sa www.boxingscene.com, init gyud kaayo ang panag-away sa duha ka mga boksidor.

Sa 6th round, gikuhaan og puntos si Lazarte gumikan kay iyang gipaak ang abaga ni Casimero, kinsa nakuhaan sab og puntos sa 4th ug 8th rounds tungod sa foul blows.