Casimero Team moabot na ugma

Sunday, February 12, 2012

NAGLARAW ang Man­daue City nga mopahigayon og hero’s welcome alang sa bag-ong International Bo­xing Federation (IBF) light flyweight champion nga si Johnriel “Quadro Alas” Casimero.

Kon wala’y kausaban sa eskedyul, si Casimero ug mga kaubanan niini mobalik dinhi sa Sugbo ugma gikan sa iyang da­­kong kalampusan sa Buenos Aires, Argentina.

Have something to report? Tell us in text, photos or videos.

Gipasabot ni Manda­ue City Vice Mayor Glenn Bercede, kinsa mao sab ang sports chairman sa si­yudad, nga makighugpong siya k ang Mayor Jonas Cortes karong adlawa kabahin sa lakang nga ilang pagahimuon inig abot ni Casimero.

“Nalipay ug proud ka­ayo ta sa kalampusan ni Casimero. Mura’g sa Ormoc City man na siya natawo pero dugay na siyang nagpuyo sa Mandaue. Garbo sab na nato siya sa Mandaue,” matod ni Bercede.

Nidugang si Bercede nga plano nilang hatagan og cash incentive si Casimero nga maoy ilang naandang gimbuhaton ngadto sa Mandauehanong mga atleta nga ma­kahatag og dakong dungog sa siyudad.

“Ato gyud na siyang i-welcome. Magsabot pa ni Mayor bahin ani,” dugang ni Bercede.

Dili gyud sayon ang naagian ni Casimero una niya naangkon ang kalampusan sa langyaw nga yuta.

Mainiton ug saktong binukbokay ang naagian ni Casimero (16-2, 10KOs) una siya nakaposte og 10th round TKO nga kadaugan batok sa beteranong Argentinian Luis Lazarte (29-11, 18KOs) niadtong Dominggo.

Human sa away, niulbo ang grabeng riot diin gipang-atak ang Team Casimero sa gatusan ka Argentinian fans ibabaw sa ring.

Gipanglabay sila og mga botelya sa tubig, sensiyo, mga bangko ug uban pa.

Ang referee sa maong away nahidangat sa ospital gumikan sa bun-og.

Gani hasta sila si Gelloani ug Tepora wala ma­kaikyas sa pag-ataki – nasumbagan ug nanga-igo sa gyud sila sa pagpamato.

Adunay higayon sa 6th round nga gipaak ni Lazarte ang abaga ni Casimero.

Sa 9th round nakakita og kahayag si Casimero dihang nataymingan sa iyang makusog nga
kumo ang apapangig ni Lazarte, kinsa maayo gyung pagkatumba.

Gitumba na sab pagbalik ni Casimero si Lazarte sa mao gihapong round. Nakabarog ug nakatiwas ra hinuon sa round si Lazarte apan tatawng bungog pa gyud kini.

Sa 10th roujnd, gitumba na sab pagbalik ni Casimero si Lazarte. Mibarog lang gihapon ang naulahi apan gitiwasan kini’g kulata sa Mandauehanon ug giundang na sa referee ang away.